Shalǵaıdaǵy Denısov aýdanynyń Frýnze aýylynda «Balapan» bóbekjaıy kúrdeli jóndeýden keıin paıdalanýǵa berildi. Buǵan deıin jergilikti mekteptiń bir buryshyn panalap kelgen balabaqsha jańa jyl qarsańynda zamanaýı úlgide jańǵyryp, ásem keıipke engen jańa ǵımaratqa kóshti.
Bóbekjaı qurylysyna 440 mln teńge jumsalǵan. Jaz boıy eski ǵımarattyń ınjenerlik jelileri, esik-terezesi aýystyrylyp, jańa jeldetý júıesi ornatyldy. Ishi-syrtyna qaıtadan jaryq tartylyp, balalardyń qaýipsizdigine qajet dúnıelerdiń bári ornatylǵan.
Eski ǵımarattyń jańaryp, el ıgiligine qyzmet ete bastaýyna jergilikti kásipker Nıkolaı Shererdiń kóp eńbek sińirgenin aıta ketý kerek. Kásipker nysannyń jobalyq-smetalyq qujatyn óz qarjysyna jasatqan.
«Qazir balabaqshada úsh top jumys istep jatyr. 65 bala bar. Eki top orys tilinde, bir top qazaq tilinde tárbıe beredi. Jańa balabaqshanyń ashylýy aýyl turǵyndary úshin úlken mereke deýge bolady. Shynyn aıtsam, qııanda jatqan shaǵyn shalǵaı aýyldaǵy balabaqsha qurylysyna memleket qarjy bóle qoımaıtyn shyǵar degen oıda boldym. Degenmen qomaqty qarjy bólinip, osy kúnge jetip otyrmyz. Búkil aýyl turǵyndary bolyp Prezıdentimizge rahmet aıtamyz. О́tinishimizdi qup alyp, barynsha qoldaý kórsetken oblys basshylaryna da razymyz. Sońǵy úsh jyl ishinde aýylymyzda qyrýar sharýa isteldi. Asfalt tóselip, sý tartyldy, joǵymyzdyń bári túgendeldi. Endi, mine, kópten beri turalap qalǵan balabaqshamyz adam tanymastaı ózgerip shyǵa keldi. Balalarymyz ben nemerelerimiz dál osyndaı eńseli bóbekjaıda tárbıelenýge tıis», deıdi aýyl janashyry Nıkolaı Sherer.
Jalpy, Denısov aýdanynda 22 balabaqsha jumys isteıdi. 500 bala osy balabaqshalardan tárbıe alyp jatyr.
Qostanaı oblysy