Jyl qorytyndysynda Birikken kúres áleminiń (UWW) reıtıngi jańardy. Úzdikter tiziminde elimizdiń birneshe balýany bar.
Erkin kúres sheberleri arasynda eń úzdik nátıje Asyljan Esengeldige tıesili. 61 kg salmaqta kúsh synasyp júrgen qandasymyz UWW tiziminde tórtinshi orynda. Byltyrǵy maýsym Asyljan úshin tabysty boldy. Birqatar mańyzdy jarysta júlde alyp, Horvatııa astanasy Zagrebte uıymdastyrylǵan álem chempıonatynda qola medalǵa qol jetkizdi.
92 kg salmaq dárejesindegi Kamıl Krýglıev segizinshi satyǵa jaıǵassa, 70 kg salmaqtaǵy Nurqoja Qaıpanov toǵyzynshy orynǵa turaqtady. Bir keremeti, Nurqojanyń qorjynynda dúnıejúzilik dodanyń tolyq júlde jıyntyǵy bar. Atap aıtsaq, 2019 jyly Astanada kúmispen kúptelse, 2024 jyly Tıranada top jardy. 2025 jyly Zagrebte qolaǵa qol sozdy. Sondaı-aq N.Qaıpanovtyń Azııanyń úsh dúrkin chempıony degen ataǵy bar.
Al grek-rım kúresinen álem chempıony atanyp, Alash jurtynyń talaı jylǵy armanyn oryndaǵan Aıdos Sultanǵalı (60 kg) besinshi orynda. Sońǵy ret «klassıkter» dúnıejúzilik dodada 1999 jyly daralanǵan edi. Ol kezde Afınada Mkhıtar Manýkıan top jardy. Endi, mine, shırek ǵasyrdan asa ýaqyttan keıin Zagrebte Aıdostyń asyǵy alshysynan tústi. Mereı Máýletqanov (72 kg) pen Islam Evloev (87 kg) altynshy, Álimhan Syzdyqov (130 kg) onynshy orynǵa taban tiredi.
Áıelder kúresinen elimizdiń eń úzdik balýany Jámıla Baqbergenova (72 kg) UWW reıtınginde altynshy orynda. Byltyrǵy maýsym qazaq qyzy úshin asa sátti bolmady. Sebebi osyǵan deıingi álem chempıonattarynda úsh kúmis, bir qola oljalaǵan Jámılanyń álem chempıonatynan qorjyny bos qaıtty. Vıktorııa Hýsaınova (59 kg) toǵyzynshy orynda, Elmıra Syzdyqova (76 kg) úzdik ondyqty túıindep tur.