«Transferroom» portaly jyl qorytyndysynda 21 jasqa deıingi fýtbolshylardyń arasynan úzdikterdi anyqtady. Bir qýantarlyq jaıt, osy reıtıngide elimizdiń ulttyq quramasy men Almatynyń «Qaırat» klýbynyń 17 jastaǵy shabýylshysy Dastan Sátbaev kósh bastap tur. Ekinshi, úshinshi oryndarda – gondýrastyq Derek Monkada («Olımpııa») men bolıvııalyq Eskleızon Freıta («Bolıvar»).
BAÁ-niń Fýdjeıra qalasynda semserlesýden jasóspirimder arasyndaǵy Álem kýboginiń kezeńdik saıysy aıaqtaldy. Jarystyń alǵashqy kúni Sofıa Aqtaeva rapıradan kúmis medal jeńip aldy. Bastapqy básekelerde barlyq qarsylasynan basym túsken ol jartylaı fınalda qytaılyq Hý Beınıdi 15:8 esebimen qapy qaldyrdy. Fınalda otandasymyz reseılik Stefanııa Chasovnıkovaǵa ese jiberdi – 11:15. Jarystyń sońǵy kúni Tımofeı Semenov qola júlde enshiledi.
«Astana» klýby ınvestorlarynyń biri retinde olıgarh Aıdyn Raqymbaevtyń esimi atalyp jatyr. «BI Group» kompanııasynyń basshysy elordalyq klýbqa qarjylaı kómek kórsetip qana qoımaı, jańa, zamanaýı talaptarǵa saı fýtbol akademııasynyń irgetasyn qalaýdy josparlap otyr.
Tennısten elimizdiń ekinshi raketkasy Iýlııa Pýtınseva Brısbendegi (Aýstralııa) WTA 500 týrnıriniń irikteý synynan óte almaǵan edi. Degenmen chehııalyq Karolına Plıshkovanyń osy jarysqa qatysýdan bas tartqanynyń arqasynda oǵan jasyl qurlyqta qalýǵa taǵy bir múmkindik týdy. Ony Iýlııa utymdy paıdalandy. Tusaýkeser kezdesýinde amerıkalyq Heılı Baptısti 6:2, 6:4 esebimen utty. Endi ýkraınalyq Marta Kostıýkpen sheberlik baıqasady. Básekeni ekinshi kezeńnen bastaıtyn Elena Rybakına qytaılyq Chjan Shýaımen kúsh synasady. Sol sekildi Anna Danılına men serbııalyq Aleksandra Krýnıch juby 1/8 fınalda amerıkalyq Sofııa Kenın men Dezıre Kravchıkti 7:6, 6:4 esebimen eńserdi. Shırek fınalda olardy Reseıdiń qos juldyzy Ekaterına Aleksandrova men Mırra Andreeva kútip tur.
Jartylaı orta salmaqtaǵy UFC-diń eks-chempıony Djek Della Maddalena Shavqat Rahmonovpen aıqasqysy keletinin málimdedi. 29 jastaǵy Aýstralııa sportshysynyń aralas jekpe-jekti serik etkenine 10 jyl boldy. Sol aralyqta 21 kezdesý ótkizgen ol 19 márte jeńiske jetti. 14 kezdesýdi merziminen buryn aıaqtady. Djek sporttyq mansabyn bastaǵan bette eki ret jeńilgen. Odan keıin toǵyz jyldan asa ýaqyt boıy eshkimge des bermedi. Biraq byltyr qarasha aıynyń bel ortasynda reseılik Islam Mahachevten utylyp, chempıondyq belbeýinen aıyryldy. Bul kúnderi Maddalena UFC reıtınginde birinshi orynda, Shavqat ekinshi satyda tur.