Halyqqa medısınalyq kómek pen veterınarııa salasynyń qoljetimdiligi men sapasyn arttyrýǵa baǵyttalǵan memlekettik saıasat Almaty oblysynda da júıeli júzege asyrylyp keledi. Jaqynda óńirdiń jedel járdem qyzmeti men veterınarlyq uıymdarǵa jańa qyzmettik avtokólikterdiń kilti tabystalyp, qos salanyń qýanyshyn eseledi.
Saltanatty sharada oblys ákiminiń birinshi orynbasary Qanat Esbolatov óńirdiń densaýlyq saqtaý qyzmeti men epızootııalyq ahýalyn saqtaýda, tamaq qaýipsizdigin qamtamasyz etýde veterınarııalyq uıymdardyń eńbegi erekshe ekenin atap ótti.
«О́tken jyldy jaqsy nátıjemen aıaqtadyq. Atqarylǵan isterdiń qatarynda oblysta «О́nerkásipti damytý» qory usynǵan lızıngtik baǵdarlama sheńberinde áleýmettik mańyzy joǵary salalarǵa qoldaý kórsetildi. 1,6 mlrd teńgege veterınarııa salasyna 71 birlik arnaıy tehnıka, sondaı-aq jedel medısınalyq qyzmetke 4,4 mlrd teńgege 90 arnaıy avtokólik satyp alyndy. Jedel járdem qyzmeti – densaýlyq saqtaý júıesindegi eń mańyzdy sala. Sondyqtan medısınalyq nysandardy salýmen qatar, olardyń jańa tehnıkalarmen jabdyqtalýyn qamtamasyz etip, jedel járdem avtoparkin de kezeń-kezeńimen jańartyp kelemiz. Mundaǵy maqsat – barlyq eldi mekende turǵyndarǵa jedel ári sapaly medısınalyq kómek kórsetýge qol jetkizý. Soǵan oraı, búgin jedel járdem qyzmeti 20 jańa sanıtarlyq avtokóliktermen tolyqtyryldy. Aqpan aıyna deıin lızıngpen qarjylandyrý arqyly taǵy 70 sanıtarlyq avtokólik jetkizý josparlanǵan. Bul, ásirese, aýyldyq jerlerden túsken shaqyrtýǵa jetý ýaqytyn qysqartyp, turǵyndarǵa kórsetiletin qyzmet sapasyn arttyrýǵa múmkindik beredi», dedi Qanat Bolatuly.
Jańa «JAC T6», «GAZ 231073» avtokólikteriniń kilti ár aýdannan kelgen qos salanyń eńbek ardagerlerine saltanatty túrde tabystaldy. Avtokólikter alǵashqy medısınalyq kómek kórsetýge arnalǵan qajetti qural-jabdyqtarmen tolyq qamtamasyz etilgen.
О́tken jyly aımaqta «Aýyldyq densaýlyq saqtaýdy jańǵyrtý» ulttyq jobasy aıasynda 38 medısınalyq nysan salý josparlanǵan bolatyn. Búginde 36 nysannyń qurylysy aıaqtalyp, 12-si paıdalanýǵa berilip úlgerdi. Olardyń qatarynda dárigerlik ambýlatorııa, feldsherlik-akýsherlik pýnkt pen medısınalyq pýnkt bar. Jaqynda taǵy eki ambýlatorııanyń qurylysy aıaqtalady. Qazirde oblysta 1 jedel járdem stansasy, 12 qosalqy stansa, 64 aýyldyq dıslokasııa jumys isteıdi.
Oblys ákimdiginiń málimetinshe, ótken jyly veterınarııa bólimshelerine 13 avtokólik berilgen, salanyń avtoparki 68%-ǵa jańartylǵan. Jańa avtokólikter veterınarııa mamandarynyń jumys tıimdiligin arttyryp, turǵyndardyń ótinishterine jedel áreket etýge, profılaktıkalyq, epızootııaǵa qarsy is-sharalardy der shaǵynda júrgizýge múmkindik beredi.
Almaty oblysy