Astana men Pavlodar qalasy arasyna reıstik arzan avtobýs júre bastady. Jolaýshylar eki aralyqqa nebári 4 myń teńge tólep jete alady. Jolda aıaldamalar qarastyrylmaǵan.
Pavlodarlyq jolaýshylar endi elordaǵa avtobýspen de qatynaı alady. Taksımen salystyrǵanda jolaqy quny 2,5 ese arzan. Eresekterge 4 myń, balalarǵa 2 myń teńge tóleısiz.
Bul týraly óńirlik jolaýshylar kóligi jáne avtokólik joldary basqarmasy habarlady. Turaqty baǵyttaǵy avtobýs reısine «№1 avtobýs parki» JShS qyzmet kórsetedi. «Yutong avtobýsy jolaýshylardy turaqty tasymaldaıdy. Kólikke 49 jolaýshy syıady. Avtobýs kúnde tańerteń saǵat 7.00-de Pavlodar qalasynan shyǵady. Saǵat 16.00-de Astana qalasynan keri saparlaıdy», dep málimdedi basqarmadan.
Ertis-Baıan óńirinde keıingi jyldary qoǵamdyq kólikti jańartý, tasymal salasyna sýbsıdııalaýdy engizý nátıjesin berip, jolaýshylar tasymalynyń sapasy arta bastaǵany baıqalyp otyr. Ásirese qalalardaǵy tasymal máselesinde oń ózgeris mol. Mysaly, Pavlodar qalasynda jyl sońynda qoǵamdyq kóliktiń marshrýttyq jelisin ońtaılandyrý jóninde bir aıǵa sozylǵan keshendi jumys aıaqtaldy. Nátıjesinde 11 marshrýt ońtaılanyp, 2 tıimsiz baǵyt joıyldy. Qozǵalys syzbalaryn túzetý kóliktik qoljetimdilikti, azamattardyń ótinishterin taldaý, sondaı-aq naqty jolaýshylar aǵyny men marshrýttardyń júktelý deńgeıin baǵalaý negizinde júzege asyryldy.
«Ońtaılandyrý qorytyndylaryn nazarǵa ala otyryp, jolaýshylar óte az júretin, qalalyq bıýdjetke eleýli júkteme túsirip kelgen (166 mln teńgeden astam) №5, №6, №17 marshrýttar joıyldy. Bul baǵyttarda qosymsha ózge avtobýstar men tramvaı marshrýttary bar. Budan bylaı qala mańyndaǵy №40, 41, 38, 66 marshrýttar temirjol vokzalyna deıin júretin boldy. Sheshim Temirjol vokzaly aýdanyndaǵy damyǵan kólik júıesin eskere otyryp qabyldandy. Aýmaqta jolaýshylar aǵyny 60 myń tranzaksııaǵa ósken. Sondaı-aq №66, №40 marshrýttar uzyndyǵynyń aıtarlyqtaı qysqarýyn eskere otyryp, jolaýshylardyń bir saǵat ishinde tegin aýysyp miný qyzmeti engizildi. Bir aıda 56 591 adam tegin aýysyp miný qyzmetin paıdalanǵan», deıdi Pavlodar qalasynyń ákimi Hasar Habylbekov.
Avtobýs jelisin qaıta qaraý, tartylǵan avtobýstar sanyn 262-den 252-ge deıin qysqartý esebinen marshrýttarǵa qyzmet kórsetýge arnalǵan paıdalaný shyǵyndary aıtarlyqtaı tómendegen. Jolaýshylar aǵynynyń 10%-ǵa artýy tirkelgen (kúnine 169 441-den 186 814 tranzaksııaǵa deıin). Nátıjesinde tasymaldaýshylardy sýbsıdııalaý kólemin qysqartý esebinen bıýdjet qarajaty jyl saıyn 4 mlrd teńge únemdeledi.
Pavlodar oblysy