Mańǵystaý oblysy boıynsha Memlekettik kirister departamenti óńir turǵyndary men kásipkerler tarapynan jıi qoıylatyn salyqqa qatysty úsh negizgi suraqqa túsinikteme berdi, dep habarlaıdy Egemen.kz.
Másele jyljymaıtyn múlikti satý kezinde salyq tóleý, ońaılatylǵan deklarasııany qoldaný jáne qosylǵan qun salyǵy (QQS) boıynsha mindetti tirkeýge qatysty.
Páter satý: qaı kezde salyq tólenbeıdi?
Mańǵystaýlyqtardy 2025 jyly satyp alynǵan páterdi 2026 jyly satqan jaǵdaıda salyq mindettemesi týyndaı ma degen suraq alańdatyp otyr.
Departament málimetinshe, eger jyljymaıtyn múlik 2025 jyly satyp alynyp, sol jyly memlekettik tirkeýden ótken bolsa jáne ol memlekettik tirkelgen kúnnen bastap bir jyldan keıin nemese odan da kesh satylsa, qun ósiminen tabys týyndamaıdy. Demek, bul jaǵdaıda salyq tóleý talap etilmeıdi.
Alaıda zańnamadaǵy ózgeristerge sáıkes, 2026 jylǵy 1 qańtardan keıin tirkelgen jyljymaıtyn múlik nysandaryna ıelik etý merzimi eki jyl bolyp esepteledi.
Ońaılatylǵan deklarasııany qoldanýǵa bola ma?
Memlekettik kirister departamenti ońaılatylǵan deklarasııany Qazaqstan Respýblıkasynyń rezıdenti bolyp tabylatyn jeke kásipkerler men zańdy tulǵalar qoldana alatynyn eske saldy. Bul úshin olardyń qyzmet túri tyıym salynǵan qyzmetter tizimine kirmeýi tıis.
Atalǵan tizim Úkimettiń 2025 jylǵy 14 qarashadaǵy №970 qaýlysymen bekitilgen. Eger kásipkerdiń ekonomıkalyq qyzmet túrleriniń jalpy jikteýishi (EQJJ) osy tizimde bolmasa jáne ózge talaptar saqtalsa, ońaılatylǵan salyq rejımin qoldanýǵa ruqsat etiledi.
2026 jyly QQS boıynsha mindetti tirkeý shegi
2026 jyly qosylǵan qun salyǵy boıynsha mindetti tirkeýge turý shegi 10 000 aılyq eseptik kórsetkishti quraıdy. Bul 43 250 000 teńgege teń.
Atalǵan somadan asqan jaǵdaıda salyq tóleýshi QQS boıynsha esepke turýǵa mindetti.
Vedomstvo ókilderi salyq zańnamasyndaǵy ózgeristerge erekshe nazar aýdarýǵa shaqyryp, azamattar men kásipkerlerge túsiniksiz tustardy aldyn ala naqtylap alýǵa keńes berdi. Bul zańbuzýshylyqtar men aıyppuldardyń aldyn alýǵa múmkindik beredi.