Ekinshi dúnıejúzilik soǵysynyń ardageri Pavel Vasılevıch Dasenko 7 qańtarda 101 jasqa toldy. Qostanaı oblysynyń qorǵanys isteri jónindegi departamentiniń áskerı qyzmetshileri maıdangerdiń úıine arnaıy baryp, týǵan kúni jáne Rojdestvo merekesimen quttyqtady, dep habarlaıdy Egemen.kz.
Departament ókilderi Qorǵanys mınıstriniń atynan joldanǵan quttyqtaý hatyn ardagerge tabystap, oǵan myqty densaýlyq, uzaq ǵumyr tiledi.
«Siz Uly Jeńiske ólsheýsiz úles qosqan, batyrlyq pen tabandylyqty tý etken qaharman urpaqtyń ókilisiz. Sizdiń ómir jolyńyz biz úshin otansúıgishtik pen halqyna adal qyzmet etýdiń jarqyn úlgisi», dedi ardagerlermen jumys jónindegi qyzmet basshysy leıtenant Adııa Nurpeıisova.
Qorǵanys mınıstrliginiń málimetinshe, Pavel Dasenko 1925 jyly Qostanaı oblysynyń Vladımırovka aýylynda dúnıege kelgen. 1942 jyldyń jeltoqsanynda maıdanǵa attanyp, ekinshi Ýkraına maıdanynyń quramynda shaıqasqan. Ol Kýrsktegi urystarǵa, Korsýn-Shevchenko jáne Iаssy-Kıshınev shabýyl operasııalaryna qatysyp, Rýmynııa, Vengrııa, Chehoslovakııa jerlerin azat etýge atsalysty. Jeńisti Vena qalasynyń mańynda qarsy alǵan. Soǵys jyldarynda birneshe ret jaraqat aldy. Beıbit ómirde Ulttyq qaýipsizdik komıteti organdarynda qyzmet etti.
Maıdangerdiń erligi II dárejeli Otan soǵysy ordenimen, «Germanııany jeńgeni úshin», «Erligi úshin», «Keńes Odaǵynyń marshaly Jýkov» medaldarymen baǵalandy. Sondaı-aq Prezıdent Jarlyǵymen «Eren eńbegi úshin» medalimen marapattalǵan.