Aqmola oblysy prokýratýrasy qabyldaǵan sharalar arqyly quny 82 mln teńgeni quraıtyn jer telimi memleketke qaıtaryldy. Kináli laýazymdy tulǵalar ákimshilik jaýapqa tartyldy, dep habarlaıdy Egemen.kz.
Bas prokýratýra málimetinshe, Sandyqtaý aýdanynyń prokýratýrasy jer komıssııasynyń qyzmetin taldaý barysynda aýyl sharýashylyǵy óndirisin júrgizý úshin ýaqytsha óteýli jer paıdalaný quqyǵyn berý jónindegi konkýrs qorytyndylaryn shyǵarý kezinde zańnama talaptarynyń buzylǵanyn anyqtady.
Konkýrstyń qorytyndylary úsh kezeńde shyǵarylǵan. Al qoldanystaǵy zańnamada konkýrs ótkizilgennen keıingi kúni qorytyndylardy shyǵarý kózdelgen. Bul konkýrs rásimderiniń ashyqtyǵy men obektıvtiligine teris áser etken.
«Prokýrorlyq qadaǵalaý aktisi boıynsha sot tártibimen 7 jaldaý sharty jaramsyz dep tanyldy. Nátıjesinde memleket menshigine jalpy aýdany 1 400 gektar bolatyn, quny 82 mln teńge aýyl sharýashylyǵy maqsatyndaǵy jer ýchaskeleri qaıtaryldy», delingen habarlamada.