Batys Qazaqstan oblysynda «Demalys» jedel-profılaktıkalyq is-sharasy kezinde kámeletke tolmaǵan 126 balanyń ákimshilik quqyq buzýshylyq jasaǵany anyqtaldy, dep habarlaıdy Egemen.kz.
Qysqy demalys kezinde kámeletke tolmaǵandar tarapynan quqyq buzýshylyqtardyń aldyn alý, olardyń quqyqtary men zańdy múddelerin qorǵaý maqsatynda 2025 jylǵy 29 jeltoqsannan 2026 jylǵy 7 qańtarǵa deıin Batys Qazaqstan oblysy aýmaǵynda «Demalys» jedel-profılaktıkalyq is-sharasy ótken bolatyn. Osy is-shara barysynda polısııa qyzmetkerleri kámeletke tolmaǵandardyń qaraýsyz, túngi ýaqytta zańdy ókilsiz júrýine jáne alkogol ónimderin satý talaptaryn buzýy faktilerin anyqtaýǵa baǵyttalǵan keshendi profılaktıkalyq jáne baqylaý sharalaryn ótkizdi.
On kúnge sozylǵan is-sharanyń qorytyndysy boıynsha ishki ister organdaryna kámeletke tolmaǵan 130 bala jetkizilgen. Olardyń 126-sy – ákimshilik quqyq buzýshylyq jasaǵany úshin, al 4-ýi – qaraýsyz jáne beıbereket júrgeni úshin aıyptaldy.
«Biz bul balalardyń úsheýin Adaptasııalyq ortalyqqa ornalastyrdyq. Jalpy is-shara barysynda 205 ákimshilik quqyq buzýshylyq anyqtaldy. Onyń ishinde ata-analardyń nemese zańdy ókilderdiń tárbıelik mindetterin oryndamaǵan 15 oqıǵa, túngi ýaqytta oıyn-saýyq oryndarynda bolǵan 8 bala anyqtaldy. Alkogol ónimderin satý talaptary 5 ret buzyldy. Qoǵamdyq orynda ishimdik iship, mas kúıinde júrgen adam qamaýǵa alyndy. Osy kezeńde 176 bala túngi ýaqytta zańdy ókilsiz nemese turǵynjaıdan tys jerde bolǵany anyqtaldy», deıdi oblystyq polısııa departamenti baspasóz qyzmetiniń jetekshisi Nurjan Qýanǵalıev.
Búginde polısııanyń arnaıy profılaktıkalyq esebine jańadan áleýmettik jaǵdaıy nashar 5 otbasy qosylǵan. Buǵan deıin profılaktıkalyq esepte turǵan 235 otbasy jáne tizimdik esepte turǵan kámeletke tolmaǵan 155 bala tekserilgen.