Týrızm salasyn damytý maqsatynda elimizdiń birqatar óńirinde oıyn aımaqtaryn salý múmkindigi boıynsha áleýmettik-ekonomıkalyq zertteý júrgizildi. Týrızm jáne sport mınıstrliginiń habarlaýynsha, jańadan salynatyn oıyn aımaqtary tek sheteldik týrısterge qyzmet kórsetedi, dep jazady Egemen.kz.
Al el azamattaryna atalǵan oıyn alańdaryna kirýge tyıym salynady.
Mınıstrliktiń málimetinshe, álemdik tájirıbe birqatar elde tek sheteldikterge arnalǵan oıyn aımaqtarynyń bolýy týrısterdi tartýdyń jáne kýrorttyq ınfraqurylymdy damytýdyń tıimdi tetigine aınalǵanyn kórsetip otyr.
Mundaı tájirıbe ishki áleýmettik ortaǵa keri áser etpeı, ekonomıkalyq ósimge oń yqpal etken. Zertteý qorytyndysyna sáıkes, Mańǵystaý oblysy turǵyndarynyń 46%-y sheteldikterge arnalǵan kazıno salý bastamasyn qoldaǵan.
Ekonomıkalyq boljam boıynsha, 2029 jylǵa qaraı óńirge 148 myń sheteldik týrıst keledi dep kútiledi. Bul 7 myń turaqty jumys ornynyń ashylýyna jáne bıýdjetke 1,2 mlrd teńge salyq túsimin qamtamasyz etýge múmkindik beredi.
Jetisý oblysynda saýalnamaǵa qatysqandardyń 67 paıyzy kazıno qurylysyna qarsy emes ekenin bildirgen. Boljam boıynsha, 2029 jylǵa qaraı óńir jyl saıyn 36 myńǵa deıin sheteldik týrıst qabyldap, shamamen 700 jańa jumys orny ashylady. Jergilikti bıýdjetke jylyna 2,4 mlrd teńge salyq túsedi dep boljanyp otyr.
Almaty oblysynda respondentterdiń 54,5 paıyzy oıyn aımaqtaryn salý bastamasyn qoldaıtynyn atap ótken. Ekonomıkalyq taldaýǵa sáıkes, 2030 jylǵa qaraı óńirge keletin sheteldik týrıster sany 22 810 adamǵa jetedi. Sonymen qatar 2028 jylǵa deıin eki oıyn aımaǵynan 6,5 mlrd teńge salyq túsip, 2 myń turaqty jumys orny ashylady.
Aıta keteıik, oıyn aımaqtaryn belgileý jáne olardyń qyzmeti «Oıyn bıznesi týraly» Qazaqstan Respýblıkasynyń zańyna sáıkes júzege asyrylady. Aımaqtardyń naqty shekarasyn jergilikti atqarýshy organdar aıqyndaıdy. Al jumys tártibine sáıkes, oıyn oryndaryna tek shetel azamattary ǵana kire alady.