Májilis depýtattary, «AMANAT» partııasy fraksııasynyń músheleri Rýslan Qojasbaev pen Bolat Kerimbek Jetisý oblysyndaǵy strategııalyq mańyzy bar óndiris oryndaryn aralady. Jumys sapary aıasynda jergilikti óndiristiń áleýeti men jańa jumys oryndaryn qurý máselelerine erekshe nazar aýdaryldy, dep habarlaıdy Egemen.kz.
Depýtattar barǵan nysandardyń biri – 2018 jyldan beri elektr symdary men kabel ónimderin shyǵaryp kele jatqan «Taldyqorǵan Kabel» kásiporny. Búginde zaýytta 200 adam turaqty jumyspen qamtylǵan. Kásiporyn ishki naryqty otandyq ónimmen qamtamasyz etip, óńirdiń ónerkásiptik áleýetin arttyrýǵa eleýli úles qosyp otyr.
«AMANAT» partııasy fraksııasynyń múshesi Bolat Kerimbek otandyq óndiristiń el ekonomıkasy úshin mańyzyn atap ótti.
– Mundaı kásiporyndar – óńir ekonomıkasynyń tiregi. Otandyq óndiristiń damýy ımportqa táýeldilikti azaıtyp, jańa jumys oryndaryn ashýǵa múmkindik beredi. Memleket úshin eń bastysy – naqty ónim shyǵaryp, eldiń suranysyn qamtamasyz etip otyrǵan zaýyttardy qoldaý. Jetisýdaǵy óndiris oryndary osy talaptarǵa tolyq jaýap beredi – dedi Bolat Kerimbek.
Májilis depýtaty Rýslan Qojasbaevtyń aıtýynsha, óndiristik ınfraqurylymdy damytý – óńirlerdiń turaqty ósimin qamtamasyz etetin basty faktorlardyń biri bolyp otyr. Onyń pikirinshe, jańa óndiris oryndarynyń ashylýy ekonomıkany ártaraptandyryp qana qoımaı, halyqty turaqty jumyspen qamtýǵa múmkindik beredi. Depýtat Jetisý oblysynda iske asyrylyp jatqan jobalardy osynyń naqty dáleli retinde atap ótti.
Aıta keteıik, «AMANAT» partııasynyń saılaýaldy baǵdarlamasyn iske asyrý aıasynda Jetisý oblysy boıynsha josparlanǵan 89 is-sharanyń búgingi tańda 84-i tolyq oryndalǵan. Sońǵy jyldary óńirde 15 jańa óndiris orny iske qosylyp, 2 kásiporynnyń óndiristik qýaty artty. Sonymen qatar 25 ınvestısııalyq joba júzege asyrylyp, nátıjesinde 988 jańa jumys orny ashyldy.
Taldyqorǵan qalasynda ónerkásip óndirisiniń kólemi 11 aıdyń qorytyndysy boıynsha 6,5%-ǵa ósip, 166,4 mlrd teńgeni qurady. Al 2022-2024 jyldar aralyǵynda Jetisý oblysyna jalpy kólemi 1,2 trln teńge ınvestısııa tartylyp, onyń 809 mlrd teńgesi jeke ınvestısııalar úlesine tıesili boldy. Atalǵan kezeńde óńirde 3,8 myń jańa jumys orny quryldy.