Abaı oblysyndaǵy Shaǵan kentiniń turǵyndary jańa jyldy jańa sý qubyrymen qarsy alyp, shattyqqa keneldi.
Shaǵan kenti oblys ortalyǵynan 75 shaqyrym qashyqtyqta ornalasqan. Búginde eldi mekende 569 adam turady. Ondaǵy sý qubyry jelileriniń qurylys jobasy 2024 jyly bastalyp, ótken jyldyń sońynda tolyq aıaqtaldy. Joba aıasynda 1, 2 kótergish sorǵy stansalary, KTPN qondyrǵysy, sý tazartý júıesi, taza sýǵa arnalǵan rezervýarlar salyndy. Buǵan qosa, jalpy uzyndyǵy 19 shaqyrymdy quraıtyn sý qubyry jelileri tartyldy. Sonyń nátıjesinde, kent turǵyndary sapaly ári taza aýyzsýmen tolyq qamtamasyz etildi. Sonymen qatar jańa sý qubyrynyń eldi mekenniń órt qaýipsizdigin arttyrýǵa da múmkindigi zor.
Buǵan deıin eldi mekende ortalyqtandyrylǵan sý qubyry múlde bolmaǵan eken. Aýyl turǵyndary sýdy uńǵymalar men kolonkalar arqyly tasyp kelgen. Jańa nysannyń iske qosý saltanatyna qatysqan oblys ákimi Berik Ýálı aýyl turǵyndarynyń ómir súrý sapasyn arttyryp, óńirdiń áleýmettik ınfraqurylymyn damytýǵa serpin beretinin aıtty.
«Memleket basshysynyń halyqty sapaly aýyzsýmen qamtamasyz etý jónindegi tapsyrmasyna sáıkes óńirde 33 joba júzege asyrylyp jatyr. Sonyń biri búgin sizderdiń aýyldaryńyzda iske qosyldy. Joldyń boıynda ornalasqan Shaǵan aýylynyń bolashaǵy zor. Kýrchatov qalasy da jaqyn. Bul shaharǵa qazir erekshe mán berilip, ǵylym ortalyǵy bolaıyn dep jatyr. Shaǵan aýyly keshe ǵana «Taza Qazaqstan» baǵdarlamasy aıasynda jarııalanǵan «Úlgili aýyl» baıqaýynda jeńimpaz atanyp, oblysymyzdyń úzdik 20 aýylynyń qataryna endi. Aýylǵa qajet jańa traktorǵa ıe boldy. Bul – úlken jetistik, aýyl halqynyń bereke-birliginiń aıǵaǵy. Aýyldaryńyz ósip, órkendeı bersin», dedi óńir basshysy.
Aýyl turǵyndary sý qubyrynyń paıdalanýǵa berilgenine rızashylyqtaryn bildirdi. Aıta keteıik, ótken jyly Jańasemeı aýdanynyń Alǵabas, Prırechnoe aýyldaryna da aýyzsý berildi.
Abaı oblysy