Almaty oblysy, Jambyl aýdanynyń Suranshy, Jaısan aýyldarynda Memleket basshysynyń tapsyrmasyna sáıkes júzege asyrylyp jatqan «Aýyldyq densaýlyq saqtaýdy jańǵyrtý» ulttyq jobasy aıasynda zamanaýı talaptarǵa saı dárigerlik ambýlatorııalar óz jumysyn bastady.
Jańa medısınalyq nysandardyń ashylý rásimine oblys ákiminiń birinshi orynbasary Qanat Esbolatov qatysty. Aýyldyq jerlerde sapaly medısınalyq qyzmet kórsetý óńirlik, ulttyq deńgeıdegi basym mindetterdiń biri ekenin aıta kele: «Halyq densaýlyǵy – memlekettiń basty qundylyǵy. Osyǵan oraı aýyl turǵyndaryn sapaly ári qoljetimdi medısınalyq kómekpen qamtamasyz etý maqsatynda osyndaı nysandardy júıeli túrde iske qosyp kelemiz. Atqarylyp jatqan jumystardyń barlyǵy aýyl halqynyń ómir súrý sapasyn arttyrýǵa, densaýlyq saqtaý júıesin odan ári damytýǵa baǵyttalǵan memlekettik saıasattyń naqty nátıjesi. Jańa nysan el ıgiligine uzaq jyldar boıy adal qyzmet etedi dep senemiz», – dedi Q.Esbolatov.
Suranshy aýylyndaǵy dárigerlik ambýlatorııa 1981 jyly salynǵan ǵımaratta ornalasqan. Buryn qatty otynmen jylytylǵan nysan 2007 jyldan bastap tabıǵı gazǵa qosylǵan. Ulttyq joba aıasynda ambýlatorııa ǵımaraty tolyqtaı jańǵyrtylyp, zamanaýı medısınalyq talaptarǵa sáıkestendirildi. Búginde munda fızıoterapııa, emdik dene shynyqtyrý, dárigerge deıingi qabyldaý, akýsherlik qyzmet, kúndizgi stasıonar, oqshaýlaǵysh, analız jınaý kabınetteri jumys isteıdi. Medısınalyq mekeme aýyl turǵyndaryna alǵashqy medısınalyq-sanıtarlyq kómekti sapaly ári ýaqtyly kórsetýge múmkindik beredi.
Jaısan aýylynda 1960 jyly salynǵan eski ǵımarattyń ornyna jańa, zamanaýı medısınalyq nysan boı kóterdi. 2 527 turǵynǵa qyzmet kórsetetin ambýlatorııa qajetti medısınalyq qural-jabdyqtarmen tolyq qamtamasyz etilgen. Jańa ǵımarattyń iske qosylýy aýyl turǵyndarynyń medısınalyq kómekke qoljetimdiligin edáýir arttyryp, sapaly qyzmet alýǵa jol ashty.
Jalpy, Almaty oblysynda «Aýyldyq densaýlyq saqtaýdy jańǵyrtý» ulttyq jobasy aıasynda barlyǵy 38 densaýlyq saqtaý nysanynyń qurylysy qarastyrylǵan. Jobany júzege asyrýǵa 8,3 mlrd teńge bólingen. Onyń ishinde Jambyl aýdanynyń 16 eldi mekeninde 7 dárigerlik ambýlatorııa, 3 feldsherlik-akýsherlik pýnkt, 6 medısınalyq pýnkttiń qurylysy júrgizildi. Búginde 16 medısınalyq nysannyń 7-eýi paıdalanýǵa berilgen, qalǵan 9 nysandy jaqyn merzimde tolyq aıaqtaý josparlanǵan.
Jańa medısınalyq mekemelerdiń paıdalanýǵa berilýi aýyl turǵyndarynyń ómir súrý sapasyn arttyryp qana qoımaı, profılaktıkalyq sharalardy kúsheıtýge, aýrýlardy erte anyqtaýǵa, medısınalyq qyzmetterdiń sapasyn jaqsartýǵa múmkindik beredi. Bul óz kezeginde aýyldyq jerlerdegi halyq densaýlyǵyn nyǵaıtyp, ulttyq densaýlyq saqtaý júıesin damytýdyń mańyzdy quramdas bóligine aınalady.
Almaty oblysy,
Jambyl aýdany