О́tken jyldyń sońynda tanymal shahmatshy Bıbisara Asaýbaevanyń blısten Qatar astanasy – Dohada úsh dúrkin álem chempıony atanǵany belgili. Osy tarıhı jeńis qazaq qyzynyń bedelin ósirip, abyroıyn arttyrdy.
Bıbisara dál osyndaı tabysqa jetken jer-jahandaǵy ekinshi shahmatshy retinde óz esimin sporttyq shejirege altyn áriptermen jazdy. Birinshi bolyp ondaı ataqqa 2010, 2018, 2019 jyldary kezinde Ýkraına quramasynyń sapynda oınap, keıinnen Reseıdiń azamattyǵyn alǵan Ekaterına Lagno qol jetkizdi. B.Asaýbaevaǵa bul beles 2021, 2022, 2025 jyldary baǵyndy.
Ekinshiden, Bıbisara álemdik reıtıngtegi jaǵdaıyn jaqsartty. Qazirgi kezde ol klassıkalyq shahmattan 11-oryndy ıelenip tur. Qorjynynda 2497 upaıy bar. Asaýbaevanyń aldynda Ifan Hoý, Szıner Chjý, Tınsze Leı, Venszıýn Szıýı (Qytaı), Hampı Konerý (Úndistan), Aleksandra Gorıachkına (Reseı), Chjýnı Tan (Qytaı), Anna Mýzychýk (Ýkraına), Ekaterına Lagno (Reseı), Polına Shývalova (Reseı) syndy myqtylar bar. Blısten qandasymyz birden bes satyǵa joǵarylap, búginde úzdik úshtikti túıindep tur. Bıbisara tek Hoý Ifan men Szıýı Venszıýnnen qalyp keledi.
Úshinshiden, Dohadaǵy jeńis oǵan FIDE-niń «Úmitkerler týrnırinde» baq synaýǵa múmkindik berdi. Bul – elimizdiń shahmaty tarıhyndaǵy teńdessiz oqıǵa. Sebebi, buryn-sońdy birde-bir jerlesimiz osyndaı bedeli zor, mártebesi asa joǵary jarysta óner kórsetken emes. Ondaı baq Bıbisaraǵa buıyrdy. 28 naýryz – 16 sáýir aralyǵynda Kıpr aralynda ótetin dodada qazaq qyzynan bólek, qytaılyq Szıner Chjý, Chjýnı Tan, reseılik Aleksandra Gorıachkına, Ekaterına Lagno, úndistandyq Dıvıa Deshmýkh, Hampı Konerý, Vaıshalı Rameshbabý sheberlik baıqasady. Osy básekede jeńiske jetken oıynshy álem chempıony ataǵyna talasý quqyǵyna ıe bolady. Bul ataq qazir Qytaıdyń ókili Venszıýn Szıýıge tıesili.
Tórtinshiden, osy chempıonattaǵy jarqyn jeńisiniń arqasynda B.Asaýbaeva materıaldyq jaǵdaıyn da biraz jaqsartyp, bas júldeni oljalaǵany úshin uıymdastyrýshylar tarapynan 40 myń eýro (23,8 mıllıon teńge) shamasynda syıaqy aldy.