PETROPAVL. 24 aqpan. Soltústik Qazaqstan oblysy M. Jumabaev aýdanyna qarasty Poltavka orta mektebiniń bastaýysh synyp oqýshylary eresekterge arnalǵan dárini ishý saldarynan ómirmen qoshtasa jazdaǵan. Bul týraly egemen.kz tilshisi habarlady.
Sonda 18 jasqa deıingi balalar tutynýǵa múldem tyıym salǵan preparatty ishýge múddeli bolǵan kim deısiz ǵoı? Ustaz!
Oblystyq ishki ister departamenti baspasóz qyzmetiniń jetekshisi Madına Balǵashoqovanyń aıtýynsha, qoǵamdyq ortany ulardaı shýlatqan jaıt 13 aqpan kúni bilim úıiniń qaq tórinde oryn alǵan. 35 jylǵa jýyq jumys ótili bar, ózin-ózi taný pániniń muǵalimi Svetlana Zýbareva ashyq sabaq ótkizý úshin 4 synypqa kelgen. Sirá, mektep esigin ashqanyna 4 jyl ǵana bolǵan baldyrǵandardyń aldynda qatty qobaljysa kerek, «fenazepam» atty asa kúshti psıhotroptyq dáriniń bir tabletkasyn qylǵytyp jibergen. Sol-aq eken, uıadaǵy balapandaı aýyzdaryn ashyp, ózine qaraı japa-tarmaǵaı umtylǵan úrpekbastardy «táıt» dep zekip, sabasyna túsirýdiń ornyna birnesheýin ustata salǵan. Sodan ne boldy deısiz ǵoı? Oqýshylardyń júris-turysy baıaýlap, minez-qulqynda ózgeris paıda bolǵan. Ony basqa muǵalimder kóre tura mán bermegen. Synypta oqýshylardyń biriniń basy aınalyp, endi biriniń qusqysy kelgen. Keshke taman preparatty túgeldeı «jutqan» eki qyz balanyń dene qyzýy kúrt kóterilip, murttaı ushqan. Ata-analary dereý dárigerlerdiń kómegine júgingen. Aq halatty abzal jandar olardyń dáriden ýlanǵanyn bilisimen aýdandyq ishki ister bólimine habarlaǵan. Al, tabletkany jarym-jartylaı paıdalanǵan eki oqýshyny perishteler qaqqan bolý kerek.
Búginde S. Zýbarevaǵa Qylmystyq Kodekstiń 141-baby boıynsha, óz qyzmetine saldyr-salaq qarady, adam densaýlyǵyna abaısyzda zalal keltirdi degen aıyp taǵylyp, qylmystyq is qozǵalǵan.
«Túsiniksiz bir kesel kópten beri janyma qatty batqandyqtan, ózimdi jaısyz sezinetinmin. Dárigerler ota jasaımyz degen soń resept boıynsha satylatyn dárini qabyldap júr edim. Oqýshylar qıylyp suraǵan soń tynyshtandyraıyn dep berip edim. Artynyń mundaı oqıǵaǵa soqtyraryn kim bilgen? – dep ókinishten barmaǵyn tisteıdi eki balanyń anasy.
Aýrýhanada jatyp shyqqan oqýshylardyń biriniń anasy «qyzym asa kúshti psıhotroptyq dárini qabyldaýdyń saldarynan áli esin jııa almaı júr. Keıbir qylyqtary qaradaı shoshyndyrady. Múgedek bolyp qalsa, kim jaýap beredi? Bala taǵdyryna kóz juma qaraıtyn mundaı adamdardyń bilim salasynda jumys isteýge qaqy joq!» dep jany kúızele sóıleıdi.
Osylaısha oqýshylarǵa ózin-ózi taný páninen sabaq berýdiń ornyna «ózin-ózi» basqa qyrynan tanytqan pedagog negizgizgi jumysynan alastatylyp, zerthanashy qyzmetin atqaryp júr.
О́mir Esqalı.
Derek: egemen.kz.
Sýret: skocontrol.kz.