Memleket basshysy Qasym-Jomart Toqaevtyń tapsyrmasy aıasynda Úkimet ótken jyldyń aıaǵynda elimizdiń 2030 jylǵa deıingi kóshi-qon saıasatynyń jańa tujyrymdamasyn qabyldady. Onyń negizinde adam kapıtaly damyp, mıgranttardy sapaly irikteýge negizdelgen qaýipsiz ári basqarylatyn kóshi-qon júıesi qalyptaspaq.
Eńbek jáne halyqty áleýmettik qorǵaý mınıstrligi ázirlegen elimizdiń 2030 jylǵa deıingi kóshi-qon saıasatynyń tujyrymdamasynyń negizgi erejelerin Premer-mınıstrdiń orynbasary – Mádenıet jáne aqparat mınıstri Aıda Balaeva egjeı-tegjeıli túsindirip berdi.
Onyń aıtýynsha, qazir kóshi-qon saıasaty qoǵamdaǵy, ekonomıkadaǵy, sondaı-aq álemdegi ózgeristerdiń aıqyn kórsetkishine aınalyp otyr. Sondyqtan kóptegen el óz kóshi-qon saıasatyn qaıta qarap jatyr. Elimiz de bul baǵytta naqty qadamdar jasap, kóshi-qon júıesin zaman talabyna saı jańartyp keledi. Ol ashyq ári aıqyn bolyp, eń bastysy memleket pen azamattardyń múddesine qyzmet etýge tıis.
«Úkimet qabyldaǵan 2030 jylǵa deıingi kóshi-qon saıasatynyń tujyrymdamasynda ekonomıkanyń qajettiligi, azamattardyń múddesi men ulttyq qaýipsizdik máseleleri jan-jaqty qarastyrylǵan. Eń aldymen, biz Qazaqstan azamattarynyń múddesin basshylyqqa alamyz. Sheteldik jumys kúshi tek naqty kadr tapshylyǵy bar salalarǵa ǵana tartylady. Kóshi-qon baǵyt-baǵdary óńirler men naqty jobalardyń suranysyna saı qalyptasady», dedi ol.
Bul rette «Zań jáne Tártip» qaǵıdatynyń saqtalýyna basty nazar aýdarylady.
«Zań bárine ortaq. Sondyqtan kóshi-qon talaptaryn buzǵandar jaýapkershilikten syrt aınalyp kete almaıdy. Bul talap mıgranttarǵa da, jumys berýshilerge de birdeı qoldanylady. Qaýipsizdik elge kirýden bastap, elden shyǵýǵa deıin tolyq qamtamasyz etiledi. Bizdiń maqsatymyz – Qazaqstanǵa zańdy syılaıtyn, mádenıetimizdi qurmetteıtin adamdardyń kelýi», dep atap ótti mınıstr.
Jańa tártip osy jyldyń qańtarynan bastap engiziledi. Shetel azamattary, sonyń ishinde etnostyq qazaqtar aldyn ala irikteýden ótedi. Oǵan memlekettik tildi bilý testi, sıfrlyq saýalnama, ýákiletti organdardyń tekserýleri jáne áńgimelesý kiredi.
Vıse-premerdiń aıtýynsha, memlekettik qoldaýǵa úmitti qandastarymyzǵa arnaıy tártip bar. Memlekettik jeńildikter men qoldaý baǵdarlamalaryn paıdalaný úshin olar qandas mártebesin rásimdep, eńbek kúshi tapshy óńirlerge qonystanýy kerek. Bul – Aqmola, Abaı, Qostanaı, Pavlodar, Atyraý, Batys, Shyǵys pen Soltústik Qazaqstan oblystary.
«Biz otandastarymyzdy memlekettik strategııany ustanýǵa shaqyramyz. О́ńirlik kvotaǵa kirgen qandastar kóship kelgen kezde 5 jylǵa áleýmettik kelisimshart jasaıdy. Memleket olarǵa kóshýge, baspana men jumysqa ornalasýǵa kómektesedi. Al eger otbasy bes jyl ótpeı basqa óńirge kóshse, alǵan kómekti qaıtarýǵa tıis bolady», dep túsindirdi A.Balaeva.
Sonymen qatar balama jol da bar. Iаǵnı memlekettik qoldaýsyz, jalpy tártippen turaqty turýǵa ruqsat alýǵa múmkindik bar. Bul jaǵdaıda óńirdi azamat óz qalaýynsha tańdaı alady.
Mınıstrdiń aıtýynsha, jańa kóshi-qon saıasaty kezeń-kezeńimen engiziledi. Qoǵamnyń, bıznestiń, sondaı-aq óńirlerdiń pikiri eskeriledi. Zańdy qurmetteıtin, adal azamattarǵa árdaıym basymdyq beriledi. Sıfrlyq quraldar zańsyz áreketter men jalǵan qujattardy joıýǵa múmkindik beredi.
«Kóshi-qon máselesi zańdy, qaýipsiz ári baqylaýda bolýǵa tıis. Tek sonda ǵana ol memleketimiz ben azamattarymyzdyń múddesine saı keledi», dep sózin túıindedi A.Balaeva.