Qańtarda UBT-ny 187 myń adam tapsyrmaq

UBT-nyń ózi 10 qańtar men 10 aqpan aralyǵynda ótedi. Bıylǵy qańtar aıynda ótetin UBT-ǵa qatysý úshin ótinim bergen úmitkerlerdiń sany ótken jylmen salystyrǵanda 20 myńǵa artyp otyr.

Ulttyq testileý ortalyǵy habarlaǵandaı, 2026 jyly ult­tyq biryńǵaı testileýdiń for­maty ózgerissiz qalady. Talap­kerler úsh mindetti pándi jáne tańdaýy bo­ıynsha eki beıin­di pándi tapsyrady. UBT tapsyr­malarynyń jalpy sany – 120. Onyń ishinde «Qazaqstan tarıhy» páni boıynsha 20 tapsyrma, «Oqý saýattylyǵy» men «Ma­te­matıkalyq saýattylyq» pánde­rinen 10 tapsyrmadan, sondaı-aq eki beıindi pánniń árqaısynan 40 tapsyrmadan beriledi. UBT boıynsha eń joǵary ball da ózgermeıdi, 140 baldy quraıdy.

Testileý ýaqyty 4 saǵattan, ıaǵnı 240 mınýttan turady. Bul rette erekshe bilim berý qajet­tilikteri bar balalar úshin usy­ny­latyn qosymsha 40 mınýt ýaqyt saqtalatynyn aıta ketý kerek. Osyǵan qosa talapkerler ótinish berý barysynda testileý kúnin, ýaqytyn jáne pýnktin ózderi tańdady.

UBT tapsyrý kezinde kalkýlıator, hımııalyq elementterdiń perıodtyq júıesi (Mendeleev kestesi) jáne tuzdardyń erigishtik kestesin testileý kompıýterinde ashyq qoldana alady. Osy atalǵan kesteler men esepteý quraly aldyn ala júktelgen.

Eskerýge tıis bir nárse bar, test tapsyrýshylar testileý aıaq­tal­­ǵannan keıin 30 mınýt ishin­de apel­lıasııaǵa ótinish berýge quqyly. Apellıasııaǵa ótinish bergen testilenýshilerdiń sertıfıkaty appelıasııalyq komıssııanyń sheshiminen keıin talapkerdiń jeke kabınetinde shyǵady.

Úmitkerlerdiń quqyn qorǵaý­ǵa qosa olarǵa qoıylatyn talap ta qa­tań. Máselen, UBT aıaq­tal­ǵan­nan keıin kúntizbelik jyl­dyń 31 qaza­nyna deıin testi­leýdiń beınejazbala­ryna taldaý júrgiziledi. Tyıym salyn­ǵan zattardy paıdalaný nemese ere­jelerdi buzý faktileri anyqtal­ǵan jaǵdaıda UBT nátı­jeleri joıylady. Dál osy ta­lapqa baılanysty utyp alǵan grantynan aıyrylǵan jaǵdaı­lar da kezdesken. Sol sebepti testilenýshilerge bul erejeni esten shyǵarmaǵan abzal.

Eske sala ketsek, qańtardaǵy UBT-ǵa shartty túrde aqyly ne­giz­de kúndizgi oqý nysany boıyn­sha joǵary oqý oryndary­na qa­byldanǵandar, shyǵar­mashy­lyq BBT-dan aqyly negizde basqa daıyn­dyq baǵyttaryna, pedagogıkalyq baǵytqa aqyly negizde aýysqysy keletinder, ótken jylǵy mektep jáne kolledj túlekteri, elimizdiń azamaty emes ulty qazaq tulǵalar, shetelde bilim alǵan Qazaqstan azamattary, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.

Aıtpaqshy, byltyrǵy nátı­jeni eske túsirsek, 2025 jyldyń qańtaryndaǵy UBT-da shekti baldy 70,35%-ǵa jýyq talapker jınaǵan edi. Ortasha ball 65-ti, eń joǵary ball 139-dy quraǵan bolatyn. Sony­men qatar ol kezde talapkerler «Oqý saýattylyǵy» pánin joǵary deńgeıde tapsyrdy. Ortasha eseppen suraqtardyń 75,43%-yna durys jaýap berilgen. Al «Fızıkany» tapsyrǵan talap­kerlerdiń tek 32,32% tapsyrma­ny durys oryndaǵan, olar úshin «Elektromagnıttik ındýksııa» taqyryby qıyn bolǵan. Al bıyl­ǵy kórsetkishterdiń qandaı bolatynyn ýaqyt kórsetedi, naqtyraq aıtsaq, 10 aqpannan keıin belgili bolady.