Pavlodarlyq 7-synyp oqýshysy Imran Kýsanov respýblıkalyq olımpıadanyń eń jas jeńimpazy atandy. Onyń matematıka men baǵdarlamalaýǵa qyzyǵýshylyǵy bastaýysh synyptan-aq baıqalǵan. Qarapaıym oıyn retinde bastalǵan áýestik ýaqyt óte kele naqty maqsatqa aınalyp, jas óren kúni keshe respýblıkalyq Aýyl olımpıadasynda ınformatıka páninen birinshi oryn jeńip aldy.
Bir qyzyǵy, Imran bul saıysta ózinen eki jas úlken balalarmen, ıaǵnı 9-synyp oqýshylarymen qatar synǵa túsip, jasyna qaramastan úzdik atandy. Qazylar alqasy onyń tapsyrma sheshýdegi alǵyrlyǵyn aıryqsha atap ótti.
Imrannyń jaqyndary onyń esepke qumarlyǵy erte oıanǵanyn aıtady. Bastaýysh synyptan bastap ol túrli logıkalyq tapsyrmalarǵa qyzyǵyp, matematıkalyq esepterdi ózgeshe tásilmen sheshýge tyrysypty. Keıin ınformatıka pánimen jaqynyraq tanysqan soń, onyń qyzyǵýshylyǵy tipti arta túsken. Algorıtmdik oılaý, «Esepti qalaı jeńildetýge bolady?», «Artyq qadamdy qalaı qysqartýǵa bolady?» degen suraqtar jas oqýshynyń kúndelikti daǵdysyna aınalǵan. Informatıkadaǵy alǵyrlyǵy da osy tusta baıqaldy. Bir qaraǵanda kúrdeli kórinetin algorıtmdik esepterdi ol birneshe qadamǵa bólip, logıkasyn tez tabady. Mundaı qabilet – tek pánge qyzyǵýshylyqtyń belgisi ǵana emes, júıeli oılaý men taldaý mádenıetiniń qalyptasqanyn kórsetedi.
Jas darynnyń aıtýynsha, jarys oǵan tek bilimin tekserýge ǵana emes, ózin damytýǵa da úlken serpin bergen.
«Men ustazymmen kúndelikti daıyndalamyn. Olımpıadada algorıtmdik esepter, derektermen jumys jáne baǵdarlamalyq sheshimder ázirleý syndy kúrdeli tapsyrmalar beriledi. Ár kezeń men úshin qyzyqty boldy, tapsyrmalar kúrdelengen saıyn ózimdi damytýǵa umtyldym», deıdi Imran Kýsanov.
Imrannyń jetekshisi, ınformatıka pániniń muǵalimi Soıan Ertaıdyń bul salada 18 jyldyq tájirıbesi bar. Jalpy, ınformatıka olımpıadalary tek baǵdarlamalaý tilin bilýge ǵana emes, logıkaǵa, esepti durys sheshýge, shartty taldap, sheshimdi josparlaýǵa úıretedi. Sondyqtan mundaı saıystar jasóspirimniń oılaý mádenıetin qalyptastyrýda úlken mektep ispetti.
Imrannyń jetistigin odan ári aıshyqtaıtyn tus – onyń bul olımpıadaǵa 5-synyptan beri úzbeı qatysyp kele jatqany. Joǵary synyptardyń esepterin sheship kórý, ózinen myqty qarsylastardyń deńgeıin baǵamdaý – bári tájirıbeni molaıtqan. Buǵan deıin ol 2-shi, 3-shi oryndardy ıelenip, birneshe márte jeńis tuǵyrynan kóringen. Demek, Aýyl olımpıadasyndaǵy birinshi oryn – birneshe jylǵy úzdiksiz izdenistiń jemisi.
Imrannyń jeńisi aýyl jáne óńir oqýshylary úshin de úlken úlgi. Qazirgi zamanda ınformatıka – jaı pán emes, bolashaq mamandyqtardyń tili. Al erte jastan algorıtmge, baǵdarlamalaýǵa mashyqtanǵan oqýshy ınjenerııa, derekter ǵylymy, robottehnıka, kıberqaýipsizdik nemese bilim tehnologııalary salasynda óz ornyn taba alady. Eń qýantatyny – mundaı jetistik aýyl oqýshysynyń múmkindigi shekteýli degen túsinikti joqqa shyǵarady. Kerisinshe, durys baǵyt, úzdiksiz eńbek jáne qoldaýshy ustaz bolsa, sapaly nátıje de bolmaq.