Shymkent qalasynda Ulttyq ulannyń merzimdi áskerı qyzmetshisi qaza tapqan edi. Osyǵan baılanysty qozǵalǵan qylmystyq iske Bas áskerı prokýratýra túsinikteme berdi, dep jazady Egemen.kz.
Vedomstvonyń habarlaýynsha, qylmystyq isti Ishki ister mınıstrliginiń ońtústik óńirlik áskerı-tergeý basqarmasy tergep jatyr.
«Sarbazdyń ólimine ákelýi múmkin barlyq sebepterdi jáne onyń týystary aıtqan ýájderdi tekserý úshin qajetti tergeý áreketteri júrgizilip jatyr, sot-medısınalyq saraptamalar taǵaıyndaldy. Tergeý barysy Bas áskerı prokýratýranyń baqylaýynda. Qylmystyq-prosestik kodekstiń 201-babyna sáıkes, sotqa deıingi tergep-tekserýdiń ózge málimetteri jarııalanbaıdy», delingen habarlamada.
Vedomstvo dereginshe, 2026 jylǵy 6 qańtarda Ulttyq ulan quramyndaǵy 6506 áskerı bólimde qyzmet atqarǵan merzimdi áskerı qyzmetshiniń júregi toqtaǵan. Dárigerlerdiń ómirin saqtap qalý áreketine qaramastan, ol Shymkent qalasyndaǵy aýrýhanada kóz jumǵan. Aldyn ala sebep retinde dárigerler «jedel leıkoz» dıagnozyn ataǵan. Buǵan deıin Ulttyq ulan sarbazdyń qaıǵyly jaǵdaıǵa deıin dárigerlerdiń baqylaýynda bolǵanyn jáne tekserýlerden ótkenin málimdegen.
Eske sala keteıik, 2025 jyldyń sońynda Qasym-Jomart Toqaev ásker qatarynda sarbazdardyń qaza tabýy men jaraqat alýyna jol bermeý úshin aldyn alý sharalarynyń tıimdiligin arttyrýdy tapsyrǵan. Buǵan qosa Memleket basshysy «Turkistan» gazetine bergen suhbatynda «Sarbazdardyń jaraqat alýy men qaza bolýy órkenıetti elge jat úrdis» dep aıtqan edi.