О́tken jyldyń sońynda Petropavl qalasynda iri agroónerkásiptik ınvestısııalyq joba óz jumysyn bastady. Qalada tolyq sıkldy sańyraýqulaq fermasy ashyldy. Jańa nysannyń jumysymen Májilis depýtattary, «AMANAT» partııasy fraksııasynyń músheleri Erkebulan Mámbetov pen Dmıtrıı Koloda tanysty, dep jazady Egemen.kz.
Depýtattar óndiris aýmaǵyn aralap, eńbek jaǵdaıyn kórdi. Kásiporynnyń ónerkásiptik áleýetine nazar aýdardy. Jańa joba óńir úshin mańyzdy ekeni birden baıqaldy.
20 jeltoqsanda iske qosylǵan Eco Glade seriktestigi jylyna 2 400 tonnaǵa deıin agaricus tektes sańyraýqulaq óndirýge baǵyttalǵan. Sonymen qatar munda 4000 tonna kompost, ıaǵnı shymtezek shyǵarý josparlanǵan. Qazirgi tańda kásiporynda 65 adam turaqty jumyspen qamtylyp otyr.
Májilis depýtattary bul óndiris óńirdiń qaıta óńdeý sektoryn damytýǵa naqty úles qosatynyn atap ótti. Joba azyq túlik qaýipsizdigin nyǵaıtýǵa da baǵyttalǵan. Kásiporyn arnaıy ekonomıkalyq aımaqtyń jeńildikterin paıdalana otyryp iske asyrylǵan. Bul óndiristi jyldam jolǵa qoıýǵa jáne ınvestısııalyq shyǵyndy azaıtýǵa múmkindik bergen.
Dmıtrıı Koloda jobaǵa qatysty óz pikirin ashyq jetkizdi. «Mundaı jobalar memlekettiń qoldaýy bıznestiń mýltıplıkatıvti áser bere alatynyn naqty kórsetip otyr. Munda qomaqty ınvestısııa bar. Zamanaýı tehnologııa qoldanylyp otyr. Jańa jumys oryndary ashyldy. О́ńirdiń ónerkásiptik ınfraqurylymy damyp keledi. Otandyq bıznesti qoldaý men qaıta óńdeýge ınvestısııa tartý arqyly Memleket basshysy aıtqan turaqty ekonomıka birtindep qalyptasyp jatyr», dedi ol.
Depýtattyń aıtýynsha, osyndaı óndiristerdi iske qosý Soltústik Qazaqstan oblysynyń áleýetin aıqyn kórsetedi. О́ńir qosylǵan quny joǵary jobalardy júzege asyrýǵa qabiletti alańǵa aınalyp keledi.
Jumys sapary barysynda májilismender kásiporyn qyzmetkerlerimen de kezdesti. Olar óńirlerdiń derbestigin kúsheıtýge baǵyttalǵan jańa Bıýdjet jáne Salyq kodeksteri aıasyndaǵy zańnamalyq normalar týraly túsindirdi. Qabyldanǵan ózgeristerdiń máni men maqsaty aıtyldy.
Aıta keteıik, 5 qańtar men 13 qańtar aralyǵynda Májilistegi «AMANAT», Aýyl, Aq jol, JSDP, QHP jáne Respublica partııalarynyń fraksııa depýtattary óńirlerdi aralap júr. Bul saparlar barysynda depýtattar halyqty qabyldanǵan zańdarmen tanystyrady. Zańdardyń jergilikti jerde qalaı iske asyp jatqanyn zerdeleıdi. Sonymen qatar turǵyndardy tolǵandyratyn ózekti máselelerdi tyńdap, usynystardy jınaqtaıdy.