О́tken jyly kúzde Shymkent qalasyna qarasty Jańatalap eldi mekeninde eki úı órtenip ketip edi. Sonda halyq bolyp kómektesip, zardap shekken otbasylardyń baspanasyn turǵyzýǵa úlken járdem jasady. Qoǵam belsendisi Baǵıra Salyqbaeva qaıyrymdylyq jasaǵan azamattardyń arasynan Shymkent qalalyq máslıhatynyń depýtaty Abzal Zeınetaevty erekshe atady.
Halyq qalaýlysy kásipkerlerdi jumyldyryp, bir otbasynyń úıin qaıta jóndep berýge uıytqy bolypty. Jańatalaptyq aǵaıyndar depýtattyń azamattyǵyna dán rıza. A.Zeınetaev sol kezde áleýmettik jelidegi paraqshasynda: «Osydan biraz ýaqyt buryn Jańatalap eldi mekeninde tilsiz jaý eki birdeı otbasynyń baspanasyn sharpydy. Birinshi úı tolyqtaı órtenip, janama ornalasqan ekinshi úıdiń tek qabyrǵasy ǵana qalǵan. Bul jaǵdaı uzaq jyldar boıy óz kúshimen baspana turǵyzǵan otbasylarǵa aýyr soqqy boldy. «Amanat» partııasy Turan aýdandyq fılıalynyń tóraǵasy ári qalalyq máslıhat depýtaty retinde órtten zardap shekken eki otbasy múshelerin qabyldap, oqıǵa ornyna bardym. Jaǵdaımen jaqyn tanysyp, zardap shekken jandarǵa moraldyq ári materıaldyq qoldaý kórsetý máselesin talqyladyq. Jergilikti turǵyndar ózara uıymshyldyq tanytyp, birinshi otbasyǵa kómek jınaýdy bastap ketipti. Biz belsendi azamattarmen, kásipkerlermen birlese otyryp, ekinshi baspanany turǵyzýǵa atsalysatyn bolyp kelistik. Mundaı sátte eldiń birligi men janashyrlyǵy aıqyn seziledi. Birligimiz bekem, júregimiz meıirimge toly bolsyn!» dep jazdy.
Búginde órtke oranǵan úı aǵaıyn-týys, Jańatalap turǵyndary kómeginiń arqasynda qaıta salynyp, adamdar turyp jatyr. Janynda ornalasqan kórshi baspananyń jóndeý jumystary bitýge taıaý. Úı ıesi otbasymen ázirge jaqyn mańdaǵy saıajaıdy panalap otyr.
«Jańatalap eldi mekeniniń jańa qurylys aýmaǵynan úı salǵan edim. О́zim júk kóligin aıdaımyn. Kúzdiń orta kezi edi. Syrtta kólik jóndep jatqanmyn. Bir kezde úıden órt shyqty. Abyroı bolǵanda kelinshegim jumysta, bala-shaǵam mektepte edi. Kórshilerdi shaqyryp kelgenshe jalyn kúsheıip boı aldyrmaı ketti. О́rt qasymdaǵy kórshimniń de úıin sharpyp úlgerdi. Ázirge órttiń shyǵý sebebi neden ekeni belgisiz bolyp otyr. Jalpy, qaýipsizdik sharalarynyń bárin jasaǵanmyn. Bul da bir jazataıym oqıǵa, basqa túsken synaq. Halyqqa rahmet. Birden kómek qoldaryn sozyp, qarjylaı járdemderin kórsetti. Aǵaıyn-týys, eldiń kómeginiń arqasynda úıimdi qaıta turǵyzyp, az ýaqytta ishine kirip aldym. Birlik bolsa kez kelgen qıyndyqty eńserýge bolady. Soǵan kózim anyq jetti», deıdi órtten zardap shekken Nyshanáli Zııaqulov.
О́rt shalǵan úılerdi qaıta salyp, jóndeýge kásipkerlerdi jumyldyrýǵa, qaıyrymdylyq jumystaryn uıymdastyryp, sol okrýgten saılanǵan depýtatqa mán-jaıdy jetkizýge Turan aýdandyq ákimdigi de zor kómek kórsetti.
A.Zeınetaev bastaǵan qaıyrymdy jandar otqa oranǵan úıdiń janyndaǵy baspanany qaıta jóndeýge járdemdesip, biraz qurylys jumystaryn atqaryp berdi. Esik aldyn betonmen tegistep, úıdiń qasbetin taqtataspen árledi, shatyryn japty. Endi úıdiń ishki árleý jumystaryn tolyq jasap berýge ýádelesip otyr. Ishki qurylys jumystarynyń baǵasy shyǵarylyp, jumysshylarmen arnaıy kelisim jasalypty. Jumystar kóp kúttirmeı bastalady.
Jalpy, halyq qalaýlylarynyń qaıyrymdylyq kómekteri bir munymen shektelip qalmaǵan. Shymkent qalalyq máslıhatynyń tóraǵasy Bahadyr Narymbetovtiń aıtýynsha, depýtattar budan basqa da talaı saýapty isterge uıytqy bolyp júr. Olardyń bastamasymen áleýmettik járdemge muqtaj birneshe otbasy baspanaly bolypty.
ShYMKENT