Abaı oblysynyń kadrlyq qajettiliginiń óńirlik kartasyn ázirleýge arnalǵan mańyzdy basqosýda Memleket basshysynyń «Jańa kásipter men daǵdylar atlasyn ázirleý» jónindegi tapsyrmasyna sáıkes eńbek naryǵyndaǵy naqty suranystar talqylanyp, kadr daıarlaý júıesin jańa ekonomıkalyq talaptarǵa saı beıimdeý jaıy bezbendeldi.
Shákárim ýnıversıtetinde bolǵan forsaıt-sessııa jumysyna Ǵylym jáne joǵary bilim mınıstri Saıasat Nurbek onlaın qatysyp, kásibı kadrlardy daıarlaýdyń tıimdi júıesin qalyptastyrý memlekettik saıasattyń basym baǵyttarynyń biri ekenin aıtty.
«Prezıdent Qasym-Jomart Toqaev Joldaýynda adam kapıtalyn damytý, bilim berý júıesin jańǵyrtý, kásiptik bilimniń praktıkalyq baǵytyn kúsheıtýdi negizgi mindet retinde belgilegen bolatyn. Osyǵan oraı ótken 2025 jyl Jumysshy mamandyqtar jyly dep jarııalandy. Bul kadrlyq saıasat el ekonomıkasynyń turaqty damýy úshin ózekti másele ekenin kórsetedi», dedi mınıstr.
Sondaı-aq ol 2022 jyldan beri «Mamandyǵym – bolashaǵym» jobasy aıasynda 24 salany qamtıtyn 9 óńirlik karta ázirlengenin, 100 myńnan astam oqýshy kásibı baǵdarlaý dıagnostıkasynan ótkenin, 290 bilim baǵdarlamasy pysyqtalǵanyn jetkizdi. Bul bastamalar bilim men eńbek naryǵy arasyndaǵy tepe-teńdikti qamtamasyz etýge arnalady.
Shákárim ýnıversıtetiniń strategııa jáne áleýmettik damý jónindegi prorektory Asqar Qasymov elimizde 9 óńirde jańa kásipter atlasy daıyndalǵanyn málim etti. Ol qazirgi sıfrlandyrý dáýirinde biraz mamandyqtar jańasha sıpat alyp, jańa daǵdylar qalyptasady dep boljaıdy.
Jıynda Abaı oblysy bilim basqarmasynyń tehnıkalyq jáne kásiptik bilim berý bóliminiń basshysy Vılena Jaqypbaeva óńirge qajetti kadrlyq kartasyn ázirleýdiń mańyzyna toqtaldy. Ol atalǵan karta bilim berý uıymdaryna jańa baǵdar berip, jumys berýshilerdiń suranysyn naqty aıqyndaýǵa múmkindik týǵyzatynyn aıtty. Joǵary bilim berýdi damytý ulttyq ortalyǵy «Mamandyǵym – bolashaǵym» keńsesiniń basshysy Oljas Sákenov jobanyń máni men mindetterin jan-jaqty túsindirdi.
«Jańa kásipter men mindetterdiń atlasyn ázirleý – qala men aýyl arasyndaǵy ekonomıkalyq alshaqtyqty azaıtýǵa, eńbek naryǵy men bilim berý salasyndaǵy qajetti aqparattarmen qamtýǵa, óńirdegi eńbek ónimdiligi men halyq tabysyn arttyrýǵa baǵyttalǵan», deıdi ol.
Sessııaǵa qatysýshylar Abaı oblysynyń ekonomıkalyq múmkindikterin, trendterin, syn-qaterlerin de sarapqa saldy. Aldaǵy ýaqytta óńirde suranysy artyp kele jatqan jańa kásipter men qajetti mamandyqtar, kadr saıasatyn jetildirýdiń joldary aıqyndalyp, oblystyń kadrlyq qajettiliginiń naqty kartasy ázirlenedi. Bul karta oblystyń áleýmettik-ekonomıkalyq damý strategııasyn jetildirip, bilim berý uıymdary men kásiporyndar arasyndaǵy baılanysty nyǵaıta túseri sózsiz.
Abaı oblysy