Májilis depýtattarynyń óńirlerge josparlanǵan jumys saparlary áli jalǵasyn taýyp keledi. Bul joly depýtattar Abaı, Qaraǵandy, Batys Qazaqstan, Ulytaý oblystary men Almaty jáne Shymkent qalalarynda bolyp, jergilikti jurtshylyqpen kezdesti.
Májilis depýtaty, «Amanat» partııasy fraksııasynyń múshesi Nurtaı Sabılıanov Úrjar aýdanyna jumys sapary barysynda áleýmettik jáne ınfraqurylymdyq jobalardyń iske asyrylý barysymen tanysty, shalǵaıdaǵy eldi mekenderdiń turǵyndarymen kezdesti.
Depýtat aldymen Laıbulaq aýylyndaǵy medısınalyq pýnktke baryp, odan keıin 2 700-ge jýyq adam turatyn Taskesken aýylyndaǵy sport modýliniń jumysymen tanysty.
Jumys saparynyń sońynda depýtat Taskesken, Laıbulaq, Altynshoqy jáne Jańatilek aýyldarynyń turǵyndarymen kezdesýler ótkizdi. N.Sabılıanov kezdesýde aýyldyń damýy Memleket basshysy belgilegen negizgi mindetterdiń biri ekenin atap ótti.
Qaraǵandy oblysyna barǵan Májilis depýtattary, «Amanat» partııasy fraksııasynyń músheleri Baýyrjan Smaǵulov, Ashat Aımaǵambetov, Tilektes Adambekov, Qudaıbergen Beksultanov, Arman Qalyqov, Únzıla Shapaq jáne Nıkıta Shatalov Saran qalasynyń ındýstrıaldy aımaǵynda bolat túzý tigisti qubyrlar shyǵaratyn TEMPO Kazakhstan zaýytynyń iske qosylý barysymen tanysty. Kásiporyn turǵyn úı-kommýnaldyq sharýashylyqqa, qurylysqa jáne jylý jelilerine arnalǵan qubyr túrlerin shyǵarýdy kózdepti. Qazirdiń ózinde qosý jumystary júrgizilip, tıisti kelisimshartqa sáıkes qubyr túrleri óndirile bastaǵan. Al tolyq óndiris sıkliniń alǵashqy kezeńin aldaǵy mamyr aıynda iske qosý josparlanǵan. Artynsha ónim jelisi kezeń-kezeńimen keńeıe bermek. Májilis depýtaty Baýyrjan Smaǵulov atap ótkendeı, mundaı óndiristi iske qosý tek óńir úshin ǵana emes, búkil el úshin strategııalyq mańyzǵa ıe.
Batys Qazaqstan oblysynda bolǵan Májilis depýtaty, «Amanat» fraksııasynyń múshesi Snejanna Imasheva Oral qalasynda Batys Hub ınnovasııalyq ortalyǵynyń ujymymen kezdesip, sıfrlandyrýdyń óńirdiń damýyna tıgizer yqpalyn talqylady. Kezdesý barysynda depýtat ortalyqtyń qyzmetimen jan-jaqty tanysyp, sıfrlandyrýdyń óńir damýyna tıgizer yqpalyna erekshe toqtaldy. Ol Batys Hub bazasynda júzege asyrylyp jatqan jobalardyń aımaq ekonomıkasyn ártaraptandyrýǵa, jastardyń zamanaýı sıfrlyq daǵdylardy meńgerýine jáne ınnovasııalyq bastamalardyń keńinen qoldaý tabýyna yqpal etetinin atap ótti.
Májilis depýtaty, Qazaqstan Halyq partııasy fraksııasynyń múshesi Islam Suńqar óńirlerge jumys sapary aıasynda Shymkent qalasyna at basyn buryp, M.Áýezov atyndaǵy Ońtústik Qazaqstan zertteý ýnıversıtetine bardy. Ýnıversıtettiń professor-oqytýshylar quramymen jáne stýdentterimen ashyq formatta ótken kezdesýde joǵary bilim berý men ǵylym salasyndaǵy ózekti máseleler jan-jaqty talqylandy. Ýnıversıtet ujymy men bilim alýshylar Májilis depýtatyna ózderin tolǵandyrǵan suraqtaryn qoıyp, joǵary bilim berý júıesin jetildirýge baǵyttalǵan naqty usynystaryn ortaǵa saldy.
Májilis depýtattarynyń Jezqazǵan turǵyndarymen kezdesýinde balalar sportyn qoldaý máseleleri sóz boldy. «Amanat» partııasy fraksııasynyń músheleri Erbolat Satybaldy men Amanjol Áltaı Jezqazǵan qalasyndaǵy zamanaýı CK-NAMYS sport akademııasyna baryp, jas sportshylardy daıarlaý barysymen tanysty. «CK-NAMYS» sport akademııasy «Amanat» partııasynyń saılaýaldy baǵdarlamasy aıasynda salynǵanyn atap ótken jón. Jobaǵa shamamen 4 mlrd teńge ınvestısııa salyndy. 10–16 jas aralyǵyndaǵy 200-ge jýyq balany daıarlaýǵa arnalǵan akademııada qazirgi tańda 152 jas sportshy bilim alyp jatyr.
Májilis depýtattary, «Amanat» partııasy fraksııasynyń músheleri Aıgúl Quspan, Sergeı Ponomarev jáne Aıdos Sarym Almaty qalasynyń turǵyndarymen kezdesip, megapolıstegi birqatar uıymdar men mekemelerdi, onyń ishinde áleýmettik ınfraqurylym jáne mádenıet nysandaryn aralady. Azamattardy jeke qabyldaý barysynda Májilis depýtaty Aıdos Sarym turǵyndardyń ótinish-tilekterin tyńdap, birqatar máseleler boıynsha qoldanystaǵy zańnama aıasynda túsindirmeler berdi. Al keıbir ótinishter qosymsha zerdeleý úshin jumysqa alyndy.
Májilis depýtaty Sergeı Ponomarev Almatydaǵy Muhtar Áýezov atyndaǵy Memlekettik akademııalyq drama teatrynyń ǵımaratyna, al Aıgúl Quspan Almaty oblysynda ornalasqan Ulttyq qaýipsizdik komıteti Shekara qyzmetiniń tehnıkalyq jáne kásiptik bilim berý bólimshesine bardy.
Sonymen qatar depýtattar Naýryzbaı aýdanyndaǵy Shuǵyla shaǵyn aýdanynda salynyp jatqan II tıpti órt sóndirý deposynyń qurylysymen tanysty. Bul nysan «Amanat» partııasynyń saılaýaldy baǵdarlamasy aıasynda júzege asyrylyp jatyr.