Senatorlar óńirde qordalanǵan birqatar másele áli de sheshimin kútip turǵanyn aıtady. Senat tóraǵasynyń orynbasary Olga Perepechına Soltústik Qazaqstan oblysynyń jurtshylyǵymen kezdesip, olardyń talap-tilekterin tyńdap qaıtty. Sondaı-aq depýtattar elimizdiń batys óńirlerin aralap keldi.
O.Perepechına Teplıchnoe aýylyndaǵy 4,8 km shaqyrymdy quraıtyn jańa qorǵanys bógetiniń qurylysymen tanysty. 2024 jyly myńdaǵan úıdi sý basqan tasqynynan keıin alapatqa qarsy qaýipsizdik máseleleri qazir erekshe baqylaýda. Qurylys jumystary qańtardyń sońyna deıin aıaqtaý josparlanǵan.
«Qaıta qurý jumystary kóktemgi sý tasqyny bastalǵanǵa deıin aıaqtalýǵa tıis. Bul rette tehnologııalar men materıaldardyń sapasy joǵary bolýy qajet, óıtkeni bul óńir turǵyndarynyń qaýipsizdigi men ál-aýqatyna tikeleı áser etedi», dep atap ótti Senat tóraǵasynyń orynbasary.
Sondaı-aq ol Qyzyljar aýdanynyń Beskól aýylynda bir aýysymda 250 adamdy qabyldaıtyn jańa emhananyń qurylys alańynda, hokkeı kortyna arnalǵan metall-tentti qurylys nysanynda, Beskól №2 orta mektebinde, beıimdelgen ǵımaratta ornalasqan Podgornoe aýylyndaǵy mekteppen Beloe aýylyndaǵy apatty jaǵdaıdaǵy mektepte boldy.
Al Senat depýtattary Nurlan Bekenov, Darhan Qydyráli, Altynbek Nýhuly Aqmola oblysyndaǵy Býrabaı aýdanyn aralady. Olar sport saraıy men aýdandyq mádenıet úıi, «Bilim-ınnovasııa» IT mektebiniń jumysymen tanysty. Senatorlar aýdandyq máslıhat depýtattarymen birlesip ótkizgen dóńgelek ústel otyrysyna da qatysty. Onda Memleket basshysynyń «Turkistan» gazetine bergen suhbatynyń negizgi tujyrymdary, aldaǵy kezeńdegi birlesken jumystyń basym baǵyttary talqylandy. Sondaı-aq depýtat N.Bekenov Aqkól aýdanynda boldy. Ol Dombyraly men Keńes aýyldaryndaǵy «Aýyl – el besigi» baǵdarlamasy aıasynda jańartylǵan kentishilik joldar men sý qubyry jelilerin kórip shyqty. Senator sonymen qatar Keńes orman sharýashylyǵynda bolyp, mekemeniń materıaldyq-tehnıkalyq jabdyqtalýy men qyzmetkerlerdiń eńbek jaǵdaıymen tanysty.
Senat depýtattary Amangeldi Nuǵmanov Aqtóbe oblysyndaǵy Hromtaý, Qarǵaly, Muǵaljar men Alǵa aýdandarynda boldy. Ol Hromtaý aýdanyndaǵy Tabantal aýylynda jel elektr stansasynyń qurylysy men Aqjar aýyldyq okrýginiń jazyq stansasyndaǵy jańa mektepti, «AQMEZ» JShS-niń keńeıtiletin óndirisi men mádenıet úıin, dene shynyqtyrý-saýyqtyrý kesheni men Hromtaý qalasyndaǵy qalalyq qazandyqty qarap shyqty. Depýtat sondaı-aq Qarǵaly aýdanynda aýdandyq ortalyq aýrýhananyń qosymsha qurylysymen, Badamsha aýylyndaǵy balalar shyǵarmashylyǵy jáne óner mektebiniń jumysymen tanysty. Al Muǵaljar aýdanynda aýdandyq aýrýhananyń jóndeý jumystaryn, temirjol vokzalyn jańǵyrtý men Qandyaǵash qalasynyń Samal shaǵyn aýdanynda jańa mektep qurylysyn kórip shyqty.
Atyraý oblysyna barǵan senatorlar aýyldyq aýmaqtardy damytý barysy men mamandar jaǵdaıyn talqylady. Álibek Náýtıev pen Saǵyndyq Luqpanov S.Muqashev atyndaǵy Atyraý polıtehnıkalyq kolledjinde boldy. Onda oqý ornynyń materıaldyq-tehnıkalyq bazasyn, oqý kabınetterin zamanaýı jabdyqtarmen jaraqtandyrýyn, jalpy bilikti maman daıarlaý isiniń jaı-kúıin baqylap qaıtty. О́ıtkeni bul salada olqylyq bolmaý kerek. Memleket basshysy jumysshy, ınjener mamandardy sapaly daıarlaýdy tapsyrǵan edi.
Depýtattar Mahambet aýdanynda da bolyp, Taldykól aýylynyń turǵyndarymen kezdesti. Halyq aýyl ınfraqurylymynyń jaı-kúıin, energetıka nysandary men kommýnaldyq jelilerdiń jumysyn sóz etip, basqa da ózekti máselelerdi kóterdi.
Depýtat Sergeı Karplıýk Qostanaı oblysynda bolyp, ónerkásip sektorynyń ókilderimen, máslıhat depýtattarymen, sondaı-aq óńir aktıvimen kezdesti. Senator «Allur» kompanııasynyń óndiris alańynda bolyp, kásiporynnyń logıstıka, kólikke qoljetimdilik, ınfraqurylymdyq shekteýler sekildi máselelerine zer saldy. Zaýyt ókilderi logıstıka tizbekterin jetildirý, shyǵyndardy azaıtý, ónerkásiptik kooperasııany keńeıtý men otandyq óndirýshilerdi qoldaý jóninde usynystar aıtty.
Senator Serik О́teshov Qaraǵandy oblysyndaǵy Shahtınsk qalasynda boldy. Sondaı-aq ol Buqar jyraý aýdanynda ornalasqan «Saryarqa» arnaıy ekonomıkalyq aımaǵyna bardy. Ol buǵan qosa Qaraǵandy qalasyndaǵy №1 mamandandyrylǵan órt sóndirý bóliminiń qyzmetimen tanysty. Buqar jyraý aýdanynyń Baımyrza aýylyndaǵy aýyldyq okrýgtiń órt qaýipsizdigin qamtamasyz etý úshin qurylǵan órtke qarsy erikti jańa bekette de boldy.
Túrkistan oblysynyń Keles, Saryaǵash aýdandarynda bolǵan Álı Bektaev, Murat Qadyrbek, Alısher Satvaldıev óńirdiń agrarlyq sektoryna zer saldy. Keles aýdanynda senatorlar kezeń-kezeńimen iske asyrylyp jatqan Ecoculture-Eurasia ındýstrııalyq jylyjaı kesheniniń jumysymen tanysty. Qazir qazandyq sharýashylyǵynyń negizgi qurylys jumystary aıaqtalyp, zamanaýı jylyjaı tehnologııalary engizilip jatyr, óndiristik bloktardyń bir bóligi aýyl sharýashylyǵy daqyldaryn otyrǵyzýǵa arnalǵan. Búginde nysanda 100-ge jýyq adam jumys isteıdi, al keshen tolyq iske qosylǵanda 1 300-den asa turaqty jumys ornyn qurý josparlanyp otyr. Jobanyń birinshi kezeńinde 51 gektardan asa jer ıgerilmek, jalpy kólemi 42 mlrd teńgeni quraıdy.
Senat depýtattary Sultan Dúısembınov, Ǵalıasqar Sarybaev, Amangeldi Esbaı Jetisý oblysynda bolyp, áleýmettik, mádenı, ınjenerlik nysandardy aralady. Olar múmkindigi shekteýli jandarǵa arnalǵan «Asar» sporttyq-ońaltý ortalyǵyna baryp, ondaǵy ońaltý, sporttyq sabaqtardy ótkizý jaǵdaıymen tanysty, sondaı-aq ortalyq qyzmetkerlerimen jáne kelýshilerimen sóılesti.