Ǵalym eńbegimen bedeldi

Basqosýdyń betasharynda sóz alǵan L.N.Gýmılev atyndaǵy Eýrazııa ulttyq ýnıversıtetiniń akademııalyq máseleler jónindegi prorektory Ardaq Beısenbaı bul jıynnyń oqý orny úshin de úlken mártebe ekenin jetkize kele, ýnıversıtet basshylyǵynyń quttyqtaý hatyn jetkizdi.

«Siz bıologııa ǵylymynyń damýyna ólsheýsiz úles qosyp, ǵylymı-peda­gogıkalyq qyz­metińiz arqyly bilikti maman­dar­dyń birneshe býynyn tárbıele­dińiz. Tereń bilimińiz, joǵary kásibıligińiz jáne ǵy­lymǵa adaldyǵyńyz áriptesterińiz ben shákirtterińiz úshin úlgi», delingen quttyqtaýda.

Dóńgelek ústelge bıologııa ǵylymynyń ǵana emes, basqa da salanyń ókilderi qatysty. Máselen, fılologııa ǵylymynyń doktory, professor Amantaı Shárip ǵalym eńbeginiń eldik máni týraly aıtyp ótti.

«Bizde ǵalym az emes. Biraq solardyń biri eńbegin keńinen nasıhattaıdy, endi biri únsiz júrip-aq talaı is tyndyrady. Sardarbek Ábıuly – dál sondaı eńbekqor, zertteýleri elge qyzmet etip júrgen tulǵa. Mysaly, bárimiz kúnde tutynatyn nandy alaıyq. Et jemeıtin adam bolýy múmkin, biraq nan jemeıtin adam az. Al nannyń tórkini – bıdaı. Aǵamyz osy bıdaı quramyndaǵy belok 18–20 pa­ıyz bolsa, sańyraýqulaqta ol 30 paıyzǵa jaqyn ekenin aıtady. Ǵalym tat sańyraýqulaqtaryn kóp zerttegen. Astyq tuqymdas daqyldardyń óte zııandy aýrý­larynyń qataryna osy tat sańyraýqulaqtary da jatatynyn zerttegen. Bular bıdaı ónimin 20–30 paıyzǵa deıin jo­ıyp jiberetin kórinedi. Qysqasy, aǵamyzdyń zertteýleri bir ǵana ǵylymı ortaǵa emes, kúlli qo­ǵamǵa, aýyl sharýashylyǵyna, halyqtyń turmys-tirshiligine qyzmet etetin jumys», dedi ol.

Budan keıin sóz alǵan jıyn qonaq­tary ǵalymnyń ónegeli ómiriniń ár sátinen syr shertisti. Bilikti tulǵa sanaly ǵumyrynda basshylyq qyz­met­ter­di atqara júrip, birneshe shákirt tár­bıe­legen. Ol – 250-den astam ǵylymı eńbektiń, 9 monografııanyń, joǵary oqý oryndaryna arnal­ǵan «Fıtopatologııa» jáne «Za­manaýı mıkologııa» dep atalatyn 2 oqýlyqtyń avtory. Onyń jetekshiligimen 2 ǵylym doktory, 9 ǵylym kandıdaty, 14 PhD doktory dıssertasııalyq jumysyn qorǵaǵan. Ǵalymnyń eńbekteri otandyq jáne sheteldik ǵylymı basylymdarda jaryq kórgen.

Osy rette mereıtoı ıesiniń adamı bolmysy men ustazdyq bolmysyn aıryqsha atap ótkenderdiń biri medısına ǵylymdarynyń doktory, professor Oralbek Ilderbaev boldy.

«Kafedramyzda Sardarbek aǵanyń orny bólek. Onyń bedeli – laýazymmen emes, jyldar boıy qalyptasqan adal eńbekpen, ádil ustanymmen, sóz ben istiń birligimen kelgen bedel. Qaı jerde júrse de, qandaı qyzmet atqarsa da, ol kisi úshin eń birinshi orynda abyroı, adamgershilik, ádildik turady. Al ony bir kún emes, tutas bir ǵumyr boıy saqtap qalý – ekiniń biriniń qolynan kele bermeıtin asyl qasıet. Búginde mereıli jasqa kelse de, Sardarbek aǵa «berdim, boldym» deıtin jan emes. Kerisinshe, bergeninen bereri áli kóp ekenin kúndelikti eńbegimen dáleldep keledi. Onyń boıynan sharshaý­dy emes, jas urpaqqa degen jaýapkershilikti, ǵylymǵa degen adaldyqty kóremiz. Pedagogıka men ǵylymdaǵy mol tájirıbesi biz úshin baǵyt-baǵdar, kásibı ólshem ispetti. Jas oqytýshylar úshin – ustaz, biz úshin – aqylshy tirek, al kafedra úshin rýhanı ózek deýge bolady. Aǵamyzdyń taǵy bir erekshe qyry – eshqashan ózin alǵa shyǵarmaıdy. Kerisinshe, shákirtiniń jetistigine shyn qýanyp, áriptesiniń tabysyn óz jeńisindeı qabyldaıdy. Bul – naǵyz ustazǵa tán bıik mádenıet, úlken júrektiń belgisi», dedi O.Ilderbaev.

Mazmundy jıynnyń taǵy bir taǵylymdy tusy – Sardarbek Ábıuly atyndaǵy «Botanıka jáne mıkologııa» aýdıtorııasynyń ashylýy boldy. Ýnıversıtet ujymy ǵalymnyń ómirlik eńbegi men ǵylymı mektebine qurmet retinde arnaıy kabınetti tanys­tyryp, onyń mańdaıshasyna mereıtoı ıesiniń esimin berdi. Bul kabınet aldaǵy ýaqytta jas zertteýshilerge baǵyt-baǵdar bolatyn ortalyqqa, shákirtteri men izbasarlary bas qosatyn rýhanı quthanaǵa aınalmaq.