«Real Madrıd» fýtbol klýby Habı Alonsomen ózara kelisimi boıynsha onyń negizgi quramnyń bas bapkeri qyzmetinen bosatylǵanyn habarlady. Koroldik klýb quramany baptaıtyn jańa bapkerdiń de esimin jarııalady, dep jazady Egemen.kz.
«Real Madrıd» Habı Alonsony klýbtyń bir bólshegi bolyp qala beretinin jetkizip, ańyz oıynshy men ol bastaǵan bapkerlik quramǵa rızashylyǵyn bildirdi.
«Bizdiń klýb Habı Alonsoǵa jáne onyń barlyq bapkerlik quramyna osy ýaqyt aralyǵyndaǵy klýbqa sińirgen eńbegi men adaldyǵy úshin alǵys aıtady. Olarǵa ómiriniń jańa taraýynda sáttilik tileıdi», delingen «Real Madrıdtiń» resmı saıtyndaǵy málimdemede.
Al klýbtyń jańa bas bapkeri bolyp Alvaro Arbeloa taǵaıyndaldy. Alvaro Arbeloa 2020 jyldan beri «Real Madrıdtiń» bapkerlik quramynda bolyp, akademııada qyzmeti órlep keledi. Ol 2020-2021 jylǵy fýtbol maýsymynda «Infantil A» komandasyn chempıondyq deńgeıge deıin jetkizdi. Sodan keıin 2021-2022 jylǵy fýtbol maýsymynda «Cadete A» komandasyn sátti basqardy.
«Realdyń» jańa bapker jetekshiligindegi alǵashqy oıyny 14 qańtarǵa josparlanǵan. Sol kúni qurama Ispanııa kýboginiń 1/8 fınalynda «Albasetege» qarsy alańǵa shyǵady.
Aıta keteıik, Alvaro Arbeloa koroldik klýb sapynda 2009 jyldan 2016 jylǵa deıin dop tepti. 238 resmı matchqa qatysyp, segiz kýbok jeńip aldy.
«Real Madrıd» Habı Alonsony qyzmetinen bosatý týraly sheshimdi Saýd Arabııasynyń Djıdda qalasynda Ispanııa sýperkýboginde «Barselonadan» jeńilgennen keıin jarııalady.
Eske salaıyq, Chempıondar lıgasy aıasynda «Real Madrıd» almatylyq «Qaıratpen» kezdesip, qonaqtar 5-0 esebimen alǵa shyqqan edi.
«Qaırat» – «Real Madrıd» oıynyn tamashalaýǵa 5 myń sheteldik týrıst keldi.