Vıse-premer – Ulttyq ekonomıka mınıstri Serik Jumanǵarınniń tóraǵalyǵymen Úkimette jańa maýsymdaǵy kóktemgi dala jumystaryna daıyndyq jóninde osy jylǵy alǵashqy jıyn ótti.
Aýyl sharýashylyǵy vıse-mınıstri Azat Sultanovtyń habarlaýynsha, bıyl egistik alqaptarynyń jalpy kólemi 23,8 mln gektardy quraıdy, bul 2025 jylmen salystyrǵanda 180 myń gektarǵa artyq. Egisti ártaraptandyrý strategııasy aıasynda dándi daqyldar alqaptary qysqartylyp, 15,9 mln gektar boldy, bul ótken jylmen salystyrǵanda 112,4 myń gektarǵa az.
Buǵan qosa joǵary marjınaldy ári qaıta óńdeýde suranysqa ıe daqyldardyń egistik alqaptary ulǵaıtylyp jatyr. Máselen, maıly daqyldar 55,2 myń gektarǵa artyp, 4,045 mln gektardy quraıdy, arpa – 93,8 myń gektarǵa (2,4 mln gektar), júgeri – 42,9 myń gektarǵa (217,5 myń gektar), mal azyqtyq daqyldar 37,4 myń gektarǵa (3,1 mln gektar) ulǵaıady.
«Jambyl oblysynda júgerini tereń óńdeý boıynsha «Fufeng Group» kompanııasynyń tik ıntegrasııalanǵan jańa ındýstrııalyq parkin shıkizatpen qamtamasyz etýge júgeri egistigin edáýir arttyrý qajet. Bıyl alǵashqy kezeńdi iske qosý barysynda zaýytqa 500–700 myń tonna júgeri qajet bolady, al keıin bul kólem 1 mln tonnaǵa jetedi. Mal azyqtyq daqyldar alqaptarynyń ulǵaıýy bıyl mal sharýashylyǵyn damytýǵa arnalǵan keshendi baǵdarlamanyń bastalýymen baılanysty bolady», dedi A.Sultanov.
Jańa vegetasııalyq kezeńge daıyndyq pen eldiń ońtústik óńirlerinde egistik kóleminiń boljamdy ulǵaıýy aıasynda Qyzylorda, Túrkistan, Jambyl oblystarynyń fermerlerimen kezdesýler ótkizildi. Sýdy kóp qajet etetin daqyldardy azaıtyp, onyń ornyna sý syıymdylyǵy tómen ári tereń óńdeýdiń jańa óndiristerinde suranysqa ıe daqyldarǵa kóshý nusqalary talqylandy. Atap aıtqanda, Qyzylorda oblysynda kúrish egistigin 8,5 myń gektarǵa, Túrkistan oblysynda 7,4 myń gektarǵa qysqartý máselesi qarastyrylyp otyr. Maqta egistiginiń boljamdy kólemi 148,5 myń gektar bolǵan jaǵdaıda, tamshylatyp sýarý qoldanylatyn alqaptar 15 myń gektarǵa ulǵaıady, al dástúrli sýarý ádisteri qoldanylatyn alqaptar 11 myń gektarǵa qysqartylady.
Tabysty egis naýqanynyń negizgi quramdas bólikteri – tyńaıtqyshtar, sapaly tuqym men arzandatylǵan dızel otyny. Qajetti resýrstardy ýaqtyly satyp alýǵa Agrarlyq nesıe korporasııasy ótken jyldyń qazan aıynan bastap fermerlerden jeńildikpen nesıeleýge ótinim qabyldaýdy bastady. Búginde ótinimderdiń eń kóbi Túrkistan (28%), Aqmola (13%), Soltústik Qazaqstan (13%), Qostanaı (11%), Qaraǵandy (6%) oblystarynan túsip otyr.
Vıse-premer Energetıka mınıstrligine sharýalarǵa arnalǵan dızel otynynyń jeńildikti baǵasyn qysqa merzimde aıqyndaý men óńirlerdi munaı óńdeý zaýyttaryna bólý kestesin bekitýdi tapsyrdy. Dızel otynyn jetkizý aqpan aıynda bastalady.
Bıylǵy kóktemgi egiske qajetti 2,3 mln tonna tuqymnyń ishinde 1,5 mln tonna jazdyq daqyldar saraptamaǵa jetkizildi. Aldyn ala tekserýden 1,3 mln tonna tuqym ótkizildi, onyń 98,1%-y kondısııalyq dep tanyldy, ıaǵnı egý standartynyń 1 jáne 2 synybyna sáıkes keledi.