Aqsý aýdanyna qarasty Kóltaban aýylyndaǵy 25 oryndy shaǵyn ortalyǵy bar 120 oqýshyǵa arnalǵan mektep iske qosyldy. Jańa bilim oshaǵy beıimdelgen mekteptiń ornyna salyndy. Burynǵy ǵımaratta ashana, sport zaly men májilis zaly bolmaǵan. Qanshama jyldan beri halyqtyń tilek-aryzyna aınalǵan bilim shańyraǵy shaǵyn aýylǵa qaıta ár bere túskendeı.
Bulaı deıtin sebebimiz, buǵan deıin oqýshylar atalǵan mektepte 9-synypqa deıin bilim alsa, 10-11 synyp oqýshylary basqa eldi mekendegi mektepterge qatynap oqıtyn edi. Arnaıy avtobýs bekitilip, balalardy kórshi aýylǵa tasymaldaıtyn. Endi bul másele túbegeıli sheshildi. Ony ashylý saltanatynda sóz alǵan oblys basshysynyń orynbasary Dıas Esdáýletov jetkizdi.
«Prezıdenttiń tapsyrmasyna sáıkes óńirde qala men aýyl mektepterindegi oqytý deńgeıin teńestirý jumystary júrgizilip keledi. Mektep ǵımarattaryn jańartý, materıaldyq-tehnıkalyq bazalaryn nyǵaıtý kezeń-kezeńimen atqarylyp jatyr. Máselen, osy Kóltaban aýylyndaǵy mektepte balalar uzaq jyldan beri beıimdelgen ǵımaratta oqyp kelgen. Búgin, mine, aýylda 120 oryndyq zamanaýı mektep paıdalanýǵa berilip, jaıly ári qaýipsiz bilim alýǵa múmkindik jasalyp otyr. Ǵımarat zamanaýı talapqa saı jabdyqtalǵan. Biz bilim salasyna qoldaý sharalaryn budan bylaı da jalǵastyramyz. Jańa mektep ustazdarynyń bastamalary baıandy, eńbekteri jemisti bolsyn. Al oqýshylarǵa aıtarym, osy mektepten sapaly bilim alyp, elimizdiń damýyna úles qosatyn adal azamat bolyp ósýlerińizge tilektespin», degen ol, jańa modıfıkasııadaǵy hımııa kabınetiniń jabdyqtaryn satyp alýǵa arnalǵan sertıfıkat tabystady.
Budan soń mekteptiń qurylysyn júrgizgen merdiger uıym — «SP NEFT» JShS dırektory Nurlan Qadyrbaev jańa mekteptiń sımvolıkalyq kiltin bilim mekemesiniń dırektory Jamby Birjanovaǵa tabystady. Ǵımarattyń lentasy qıylyp, mektep saltanatty túrde ashylǵannan keıin qonaqtar bilim oshaǵynyń ishin aralap kórdi.
О́ńir ákiminiń baspasóz qyzmetiniń málimetinshe, úsh qabatty jańa mektep ǵımaratynda 11 pándik kabınet, 2 sheberhana, kitaphana, sport jáne akt zaldary, ashana, sol sııaqty 25 balaǵa arnalǵan mektepke deıingi shaǵyn ortalyq bar. Buǵan deıin bul ortalyq tek túske deıin ǵana jumys istese, qazir barlyq múmkindik jasalǵandyqtan tolyq jumys kúnine kóshken.
Jergilikti turǵyndar jaǵymdy jańalyqqa qatysty pikirimen bólisti. Olardyń qatarynda ata-analar, muǵalimder men oqýshylar da bar.
«Eń aldymen, biz úshin eń úlken qýanysh – endi balalarymyz ózderiniń týǵan aýylynan kórshiles eldi mekenderge qatynap oqymaıtyn boldy. Mektepte oqýshylardyń sapaly bilim alýyna, al biz úshin jaıly jumys isteýge barlyq jaǵdaı jasalǵan. Qajetti qural-jabdyqtarmen tolyq qamtylǵan zamanaýı pándik kabınetterimiz bar. Atap aıtqanda, zerthanasy bar fızıka kabıneti, lıngafon kabıneti, ınformatıka kabıneti jabdyqtalǵan, barlyǵynda paneldi taqtalar ornatylǵan. Munyń bári pándi tereń ári jan-jaqty túsinýge, sondaı-aq ǵylymı zertteý jumystarymen aınalysýǵa múmkindik beredi», dedi qazaq tili men ádebıeti pániniń muǵalimi Erjan Birjanov.
Sol sııaqty Kóltaban aýyly turǵyndarynyń atynan ardager Murat Rahymov batasyn berse, aýyl turǵyny Baqyt Lebaeva jerlesterin quttyqtady.
«Burynǵy mektebimiz eski edi. Endi aýyl shaǵyn bolsa da, balalarymyz ben nemerelerimiz úshin keń, jaryq, zamanaýı mektep salynyp otyr. Sonymen qatar mektepte kishkentaı balalarǵa arnalǵan jańa ortalyq ta bar. Bul – úlken qýanysh. Osy iske úles qosqan barsha azamatqa shynaıy alǵysymdy bildiremin», dedi ol.
Eń ǵajaby, joǵary synyp oqýshylarynyń qýanyshynda shek bolǵan joq. Máselen, 11-synyp oqýshysy Jańyl Túrkistan jańa nysandy jaqsy yrymǵa balap, jaqsy oqýǵa ýáde etti.
«9-synypqa deıin osy aýyldaǵy mektepte oqydym. Alaıda munda joǵary synyptar bolmaǵandyqtan, Taldyqorǵan qalasyna baryp, №19 mektepte 10-synypty aıaqtadym. Jańa mektep salynǵanyna qatty qýanyp, úlken yqylaspen óz aýylyma qaıtyp keldim. Mektep maǵan óte unady, qala mektepterinen eshbir aıyrmashylyǵy joq — bári ádemi, jaıly ári zamanǵa laıyq», dedi oqýshy.
Jetisý oblysy