Amerıkalyq «Talker Research» kompanııasy 2 myń adam arasynda saýalnama júrgizip, ár jastaǵy adamdardyń telefonǵa táýeldiligin anyqtaǵan edi. Bir tańǵalarlyǵy, «sıfrlyq dáýirdiń balalary» dep júrgen Z býynynyń 63%-y áleýmettik jeliden jalyǵyp, ekran aldynda ótkizetin ýaqytyn sanaly túrde shekteıtin kórinedi.
Jastardyń aıtýynsha, ınternette ótetin ýaqyttyń edáýir bóligi shynaıy baılanysqa emes, kerisinshe, jalǵyzdyq sezimin kúsheıtýge ulasatyn kórinedi. Sondyqtan kópshilik shynaıy ómirge qaıta bet burǵan. Saýalnamaǵa qatysqandardyń 84%-y kúndelikti daǵdysyna kitap oqý, dápterge jazý, qaǵaz kúntizbe qoldaný, ústel oıyndaryn oınaý, bólek oıatqysh qoıý sııaqty qarapaıym áreketterdi engizgen. Zertteý avtorlarynyń biri Barbara Hagen muny tehnologııadan qashý emes, oflaın ýaqyttyń qunyn túsinip, nazardy qaıta basqarýǵa umtylys dep baǵalaıdy.