Mal sharýashylyǵy salasynyń qatysýshylarynyń múddelerin úılestirý jáne qorǵaý maqsatynda jańa salalyq birlestik quryldy, dep habarlaıdy Egemen.kz Aýyl sharýashylyǵy mınıstrligine silteme jasap.
Birlestik quramyna respýblıkalyq salalyq palatalar, iri aýyl sharýashylyǵy taýar óndirýshileri, bordaqylaý alańdary, asyl tuqymdy sharýashylyqtar, et óńdeý kásiporyndary, sondaı-aq óndiristik tizbektiń ártúrli kezeńderinde – ósirýden bastap óńdeý men ótkizýge deıin qyzmet atqaratyn fermerlik qojalyqtar enip otyr.
Qazaqstan Mal ósirýshiler odaǵynyń dırektory Daýren Salyqovtyń aıtýynsha, Odaq qurý týraly sheshim kásibı qaýymdastyqtyń sala ishindegi ózara is-qımyldy júıeleý jáne mal sharýashylyǵyn damytýdyń negizgi máseleleri boıynsha birlesken ustanym qalyptastyrý qajettiligine jaýap retinde qabyldanǵan.
«Odaq qyzmetiniń basym baǵyttarynyń biri – shaǵyn jáne orta fermerlik sharýashylyqtardy qoldaý. Jańa alań fermerlerge memlekettik qoldaý sharalaryna, qarjylandyrýǵa, salalyq saraptamaǵa jáne ótkizý naryqtaryna qoljetimdilikti keńeıtýge, sondaı-aq naryqtyń iri qatysýshylarymen ózara is-qımyldy jáne kooperasııany damytýdy jeńildetýge múmkindik beredi», dedi Dáýren Salyqov.
Mal sharýashylyǵy ónimderiniń sapasyn jiti baqylaý qajet – Bıbigúl Jeksenbaı
Jalpy alǵanda, Odaqtyń qyzmeti salanyń praktıkalyq mindetterin sheshýge baǵyttalǵan: mal sharýashylyǵy ónimderiniń ónimdiligi men sapasyn arttyrý, sharýashylyqtardyń ekonomıkalyq turaqtylyǵyn nyǵaıtý, qaıta óńdeý men eksporttyq baǵyttardy damytý.
Atalǵan birlestiktiń jumysy mal sharýashylyǵynyń úılesimdi damýyna yqpal etip, otandyq óndirýshilerdiń ishki jáne syrtqy naryqtardaǵy pozısııasyn nyǵaıtady dep kútilip otyr.
Qasym-Jomart Toqaev: Mal sharýashylyǵynyń áleýetin barynsha paıdalaný qajet