Q.Sátbaev ýnıversıteti janyndaǵy Fızıka-tehnıkalyq ǵylymı zertteý ınstıtýtynyń bazasynda iske qosylǵan tájirıbelik-ónerkásiptik jeli jumysy qorytyndylandy. Elimizde kún panelderin otandyq negizde óndirýge baǵyttalǵan jańa joba naqty nátıjesin bere bastady. Joba «TehnoGrýppServıs» kompanııasymen birlesip júzege asyrylǵan. О́ndiristik jeli jylyna qýaty 150 megavattqa deıingi kún modýlderin shyǵarýǵa eseptelgen.
Instıtýt ǵalymdarynyń júrgizgen zertteýleri nátıjesinde, elimizde otandyq kún panelderi óndirile bastady. О́tken jyly iske qosylǵan bul joba elimizde jańartylatyn energııa kózderin damytýǵa, kún energetıkasy salasyndaǵy óndiristik múmkindikti keńeıtýge baǵyttalǵan. Bul ónimder joǵary tıimdiligimen, turaqty qýat berýimen, elimizdiń ártúrli klımattyq jaǵdaıyna beıimdelýimen erekshelenedi. Uzaq merzimge eseptelgen kún panelderi qazirdiń ózinde birqatar óndiris oryndarynda qoldanylady. Qoljetimdi baǵasymen joǵary sapasy tek kásiporyndar úshin ǵana emes, jeke turǵyn úıler úshin de tıimdi.
Fızıka-tehnıkalyq ǵylymı zertteý ınstıtýty elimizde kún energetıkasy salasyndaǵy jańa ǵylymı baǵyttardy alǵashqylardyń biri bolyp ıgerip otyr. Atap aıtqanda, geteroótkeldi fotoelementter boıynsha zertteýler júrgizilip, kvanttyq fızıka men nanotehnologııalarǵa negizdelgen tehnologııalyq sheshimder ázirlendi. Instıtýt ǵalymdary 20 jýyq ýaqyt boıy Germanııa men Reseıdegi jetekshi ǵylymı ortalyqtardyń tájirıbesin zerdelep, ony otandyq óndiris talaptaryna beıimdegen. Sonyń nátıjesinde, «TopCon» men «HIT» tehnologııalary negizinde kún panelderin ázirleý men óndirý jolǵa qoıyldy.
Joba eń aldymen, ishki naryqtyń suranysyn qamtamasyz etýge baǵyttalǵan. Basymdyq kún radıasııasy joǵary óńirlerdiń qajettiligin óteýge berilip otyr. Kún panelderin el ishinde óndirý ımportqa táýeldilikti azaıtyp, otandyq joǵary tehnologııaly ónimge degen senimdi arttyrýǵa múmkindik beredi.
О́tken jylǵy jumys qorytyndylary kún energetıkasynyń el úshin mańyzy artyp kele jatqanyn kórsetti. Instıtýt mamandarynyń aıtýynsha, bul sala birtindep turaqty damýdyń mańyzdy baǵyttarynyń birine aınalyp keledi. Nanotehnologııalar men zamanaýı ınjenerlik sheshimder tájirıbelik jobalar arqyly naqty nátıjege jetip, energetıkalyq qaýipsizdikti nyǵaıtýǵa jáne ekonomıkanyń jańa baǵyttaryn damytýǵa jol ashyp otyr. Q.Sátbaev ýnıversıtetiniń ǵalymdary men ınjenerleri aldaǵy ýaqytta da jańartylatyn energııa kózderin keńinen engizýge úles qosýdy maqsat etken.