Oblys ortalyǵynyń ońtústik-shyǵysynda 55 shaqyrym jerdegi Kamyshenka aýylyna dál jańa jyl keshinde jolǵa shyqqan edik.
Áýelgi kózdegen maqsatymyz – jumys baby. Kópten beri jol túspeı júrgen aýdandy óz kózimizben kórý, ekinshiden, gazetimizdiń jyldyq jazylym jaıynda bul aýdannyń kórsetkishi tómen-tuǵyn, sonyń jaıyn da uǵysyp qaıtý bolsa, úshinshi oı – jańa jylda sondaǵy aǵaıyn-týystyń arasynda bolsaq degenbiz. Sóıtip, aqar-shahar Astana emes, búginde qaıta serpilgen Semeı de emes, tanys ta beıtanys Kamyshenka aýylynda kúntizbedegi 2026 jyldy otbasymyzben osy aýylda qarsy alýdyń sáti túsken edi.
El orynǵa otyrǵan shaqta: «jańa ashylǵan klýbta jańa jyl keshi bolady eken» degendi estip, aýyl jurtymen birge biz de sonda bardyq. Aýyl taıly-taıaǵy qalmaı klýbqa jıylypty. Mádenıet oshaǵynyń ishi lyq toldy.
Sodan 10–15 kún buryn oblys ákimi Berik Ýálı Borodýlıha aýdanyna barǵan jumys sapary aıasynda, dál osy Kamyshenka aýylyna arnaıy at basyn burǵan. «Aýyl – el besigi» baǵdarlamasymen salynǵan aýyldyq mádenı klýbtyń ashylý saltanatyna qatysyp, jańa nysannyń mańyzy týraly aıtqany esimizde.
– Bul aýylda sońǵy ret 1985 jyly jańa ǵımarat retinde mektep salynǵan eken. Sodan beri boı kótergen tuńǵysh ǵımarat osy. Osy jerde jaqsy is-sharalar, konsert, kezdesýler uıymdastyrylady dep oılaımyn. Ǵımarat qurylysy sapaly, jaqsy júrgizilgen eken. Qutty bolsyn, – degen aımaq basshysy.
Rasynda 40 jyldan keıin kórgen jańa ǵımarattyń qandaı qýanysh syılaǵanyn sol aýyldaǵy aǵaıynan artyq eshkim de sezine almas. Al ony kózben kórýdiń jóni bir bólek. Birligi bekem jarasqan ártúrli ult ókilderi qara jorǵa bılep, qazaqsha án aıtyp jatty. Jyl kirgenge deıin ne túrli oıyn ótkizildi. Bári de shynaıy, aýyl jurtynyń qyzyǵy da bólek, emosııa aıqyn. Jalpy, halyqtyń kóńil kúıi erekshe, qýanyshtarynda shek joq. Áleýmettanýshylardyń zertteýinshe, áleýmettik jaǵdaı degenniń ózi áýeli halyqtyń merekelik kóńil kúıiniń kóterińki bolýynan bastalady eken. Adamdardy sózge tarttyq. 40 jyl boıy jańa ǵımarat salynbaǵan aýyl jurty bul klýbtyń shyn máninde, qajet nysan ekenin aıtyp, rızalyqtaryn bildirdi.
– Rasyn aıtqanda, dál mundaı jańa jyl keshi aýylymyzda alǵash ret ótip otyr. Kórip turǵanyńyzdaı, aýyldastardyń qýanyshtarynda shek joq. Bári de bılep, án aıtyp máre-sáre merekelep jatyr. Klýb qurylysyn ýaqytynda aıaqtap, el ıgiligine der kezinde bergizgen oblys ákiminiń tabandy eńbegine alǵysymyz zor. Aýyl – kórkeıe bersin, – deıdi aýyl turǵyny Saǵynǵan Erjanqyzy.
Kamyshenka aýyly – Podbornyı aýyldyq okrýginiń ortalyǵy. Aýyldaǵy úlkenderdiń aıtýyna qaraǵanda, eldi meken irgesinde turǵan úlken bazdarda buryn «talpaq tanaý» ósirilipti. Sóıtip, aýyl irgesi 1954 jyly A.S.Pýshkın atyndaǵy shoshqa keńsharyn uıymdastyrýǵa baılanysty qalanady. 1997 jyly keńshar negizinde «Kamyshnoe» «Qurylysshy» jáne «Podbornoe» JShS-teri, 4 sharýa qojalyǵy, mashına-traktor jóndeý sheberhanasy uıymdasypty. Aýyl jurtynyń bir bóligi qalaǵa qatynap nápaqasyn aıyrsa, birazy aýyldyń dál irgesindegi «Semeı ormany» ulttyq rezervatynda jumys isteıtin kórinedi. Aýyl – Semeı-Rýbsovsk (Reseı) halyqaralyq avtojoldyń boıynda eken. Al taǵy 18 shaqyrym júrseńiz – aýdan ortalyǵy tıip tur. Resmı derekke sáıkes, aýylda qazir 957 adam turady. Aýyl úlkenderiniń aıtýynsha, aýyl ataýy buryn – Tórttal bolǵan kórinedi. Keıin jer jaıyna qaraı, Qamysty, ıaǵnı Kamyshenka atalyp ketipti.
Aýyl ákimi Almas Shalǵynbaevtyń aıtýyna qaraǵanda, jańa nysan áli ákimdiktiń menshigine ótpegen. Sol sebepti de klýbqa jumysshy ala almaı otyrǵanyn aıtyp qaldy.
– Mádenıet oshaǵynyń qurylysy aldyńǵy jyly bastalyp, qarajat máselesine baılanysty toqtap qalǵan edi. Sóıtip, 2025 jyly mamyrda ǵımarattyń qurylysy qaıta bastaldy da, jeltoqsan aıynda paıdalanýǵa berildi. Jańa klýb aýyl turǵyndary úshin mańyzdy mádenı-áleýmettik ortalyqqa aınalmaq. Klýbta balalar men jasóspirimderge arnalǵan shahmat, doıby, toǵyzqumalaq úıirmeleri jáne mýzykalyq úıirmeler ashamyz dep josparlap otyrmyz, – deıdi aýyl ákimi.
Jańa klýb aýyl úshin qashan da mańyzdy mádenı-áleýmettik ortalyq. Kamyshenka turǵyndary úshin bul – jańa jyl keshiniń shattyǵy ǵana emes, aldaǵy kúnderde de aýyl jurtynyń merekelik kóńil kúıin kóterip, árdaıym halyqty biriktiretin orynǵa aınala bermek.
Abaı oblysy,
Borodýlıha aýdany