Qurmanǵazy atyndaǵy Qazaq ulttyq konservatorııasy álemdegi úsh úzdik shyǵarmashylyq oqý ornynyń biri «University of Music and Performing Arts Vienna» Vena mýzyka jáne sahnalyq óner ýnıversıtetimen yntymaqtastyq týraly memorandýmǵa qol qoıdy.
Atalǵan ýnıversıtet ǵasyrlar boıy álemdik óner men akademııalyq dástúrdiń qalyptasýyna yqpal etip keledi. Qazirgi kezde bilim ordasynda mýzyka, teatr jáne kıno salalary boıynsha 3000-nan astam stýdent oqıdy.
Memorandým aıasynda taraptar shyǵarmashylyq kadrlardy kásibı daıarlaý salasynda uzaqmerzimdi akademııalyq yntymaqtastyqty damytý, sondaı-aq halyqaralyq bilim jáne mádenı baılanystardy nyǵaıtý boıynsha kelisimge keldi.
Qujat birneshe negizgi baǵytty qamtıdy. Solardyń biri – akademııalyq utqyrlyqty damytý. Vokal, kompozısııa, operaǵa dırıjerlik etý jáne aspaptyq oryndaý (skrıpka, fortepıano, úrmeli aspaptar jáne perkýssııa) salalarynda shyǵarmashylyq yntymaqtastyq múmkindikteri qarastyrylǵan. Sonymen qatar mýzykataný, etnomýzykataný, mádenıet menedjmenti salasy boıynsha birlesken ǵylymı zertteýler júrgizý josparlanǵan. Yntymaqtastyq aıasynda stýdentter men oqytýshylardy halyqaralyq baǵdarlamalarǵa, onyń ishinde «International Summer Academy mdw»-ge qatystyrý josparlanǵan.
Buǵan qosa bilim, óner jáne mádenıet salasyndaǵy uzaqmerzimdi jobalardy iske asyrý múmkindigi talqylanyp jatyr.