Ankara ýnıversıteti áleýmettik ǵylymdar ınstıtýtynyń doktoranty Nargız Bekenniń «Qazaqstan medıasyndaǵy áıel bolmysy» monografııasy túrik tilinde jaryq kórdi.
Túrkııanyń Mádenıet jáne týrızm mınıstrligine qarasty Sheteldegi túrikter men olarǵa baılanysty qaýymdastyqtyń «Türkiye Bursları» shákirtaqysynyń eki márte jeńimpazy N.Beken eńbeginde elimizdegi áıel jýrnalısterdiń kásibı joly, áleýmettik genderlik róli sıpattalǵan. Sondaı-aq medıa salasyndaǵy genderlik ókildikke yqpal etetin faktorlarǵa erekshe nazar aýdarylǵan. Elimizdiń ár óńirinde qyzmet atqaratyn 10 áıel jýrnalıspen suhbat toptastyrylǵan. Olardyń qyzmettik ósýi, jumysqa qabyldaý kezindegi kedergiler, basqarýshy laýazymdarǵa qol jetkizý, jumys pen jeke ómir arasyndaǵy tepe-teńdik, sondaı-aq áıel jýrnalıster arasyndaǵy yntymaqtastyq máseleleri de jan-jaqty taldanǵan.
«Úsh jasymda ákem óndiristik apattan aýyr jaraqat aldy. Múgedektik arbaǵa tańyldy. Al úıimizdiń búkil aýyrtpalyǵyn anam kóterdi. Jalǵyz áıeldiń jastyǵyn, armanyn bir shetke ysyryp, úsh adamnyń ómirin bir arnada ustap turýy meni qatty oılandyratyn. Áıel eńbegi men úshin dál osy kórinisten bastaldy. Qıyn sátke tap bolǵanda, anam jıyrma bes jasta edi. Men bolsam dál jıyrma bes jasymda osy kitapty jaryqqa shyǵardym», deıdi kitap avtory jan syryn aqtaryp.
О́ziniń aıtýynsha, kitabyn paryz retinde jazǵan N.Beken anasynyń jáne sol sııaqty taǵdyrlas áıelderdiń eńbegine, sabyryna, jigerine degen qurmetti bıiktetý, olardyń úni bolý úshin atalǵan eńbegin oqyrmanǵa usynypty. «О́mirde keıbir suraqtar bar: adam olardy aqylymen ǵana emes, júregimen de izdeıdi. Men úshin «nege áıel taqyryby?» degen suraq dál sondaı edi. Bul akademııalyq tańdaý emes, ómirdiń ózinen týǵan úndeý bolatyn. Bul – bastan keshken únsizdik, bir áıeldiń kúresi jáne bir qyz balanyń kózimen kórgen ómiri», depti avtor.