Respýblıka boıynsha antısıklon yqpalyna baılanysty elimizdiń basym bóliginde aýa temperatýrasy aıtarlyqtaı tómendeıdi, dep habarlaıdy Egemen.kz.
«Qazgıdromet» RMK málimetinshe, 15 qańtarda soltústik jáne shyǵys oblystarda túngi ýaqytta aýa temperatýrasy 30-40 gradýs aıazǵa deıin tómendeıdi.
Ońtústik óńirlerde túnde 5-13 gradýsqa deıin aıaz, al ońtústik-shyǵys oblystarda aýa temperatýrasy 8-17 gradýsqa deıin tómendeıdi, taýly aýdandarda 20-25 gradýs aıaz bolady.
Qazaqstannyń ońtústiginde 15-16 qańtarda qar aralas jaýyn-shashyn túsip, jaıaý burqasyn soǵady. Sondaı-aq kóktaıǵaq bolýy yqtımal.
Eldiń ońtústik-shyǵysynda 16-17 qańtarda qatty qar jaýyp, jaıaý burqasyn soǵady, tuman túsip, kóktaıǵaq bolady.
Aıta keteıik, búgin Astanada jáne Qazaqstannyń 16 oblysynda daýyl bolatyny týraly eskertý jarııalandy. Osy sebepti Atyraý qalasy, Qostanaı oblysy jáne Astanadaǵy birqatar mektepte oqý onlaın formatqa aýystyryldy.