Iran prezıdenti Masýd Pezeshkıan mınıstrler kabınetiniń otyrysyn ótkizip, eldi syrtqy qysymnan qorǵaý úshin azamattardyń talap-tilegin oryndaýǵa shaqyrdy, dep jazady Egemen.kz.
Iran prezıdenti óz sózinde memlekettiń egemendikti qoldap, zorlyq-zombylyq áreketterin aıyptaý maqsatynda ótken aksııalarǵa qatysqan ırandyqtarǵa alǵys bildirdi.
Onyń aıtýynsha, úkimet halyqtyń senimin aqtap otyrsa, syrtqy jaýlardyń eldiń tynyshtyǵyn buzýǵa baǵyttalǵan áreketi sátsiz aıaqtalady. Sondyqtan ol mınıstrlikter men vedomstvolarǵa eldegi kemshilikterdi joıyp, ırandyqtardyń máselelerin sheshýde «erekshe ynta» tanytýdy tapsyrdy. Sondaı-aq árbir memlekettik organ azamattarmen ózara is-qımyl sapasyn jaqsartýǵa mindetti ekenin atap ótti.
Iran kóshbasshysy Iranǵa qarsy qysymdy kúsheıtýge baǵyttalǵan aýqymdy «gıbrıdtik soǵys» júrgizilip jatqanyn da atap ótti.
«Qazir jaý barlyq kúshin qysym kórsetýge jumyldyrǵan tusta biz halyqtyń ál-aýqatyn barlyq salada qorǵaý úshin qolda bar barlyq tásildi paıdalanýǵa mindettimiz», dedi Masýd Pezeshkıan.
Aıta keteıik, Iranda Islam Respýblıkasy tarıhyndaǵy eń aýqymdy narazylyqtar ótip jatyr. Osyǵan baılanysty AQSh prezıdenti Donald Tramp birneshe ret narazylyq bildirýshilerdi qorǵaý úshin jaǵdaıǵa aralasamyn dep ses kórsetken bolatyn.
Al Iran bıligi narazylyqtar kezinde shamamen 2000 adamnyń qaza tapqanyn habarlady.
Narazylyqtar kezinde elde ınternetke shekteý qoıyldy.
Búgin Iran áýe keńistigi jabyldy, jaǵdaıǵa baılanysty Air Astana reısteriniń marshrýty ózgerdi.