Alataý qalasynda qurylys jumystary bastaldy ma?

Ulttyq ekonomıka vıse-mınıstri Baýyrjan Omarbekov pen Almaty oblysy ákiminiń orynbasary Rýstam Isataev Premer-mınıstrdi Alataý qalasynyń aýmaǵyndaǵy ınvestısııalyq jobalardyń júzege asyrylý barysy, qala qurylysy men ınfraqurylymdyq jobalardy júzege asyrýǵa daıyndyq týraly, sondaı-aq óńirdi elektr energııasymen qamtamasyz etý, onyń ishinde qajettilikterdi eskere otyryp jańa óndiristerdi iske qosý boıynsha atqarylyp jatqan jumystardy baıandady.

Ulttyq ekonomıka mınıstrliginiń málimetinshe, búginde Alataýdyń Bas josparyna túzetý engizilip, ınjenerlik jelilerdiń salalyq shemalary, egjeı-tegjeıli josparlaý jobalary jáne ınfraqurylymdyq damýdyń Jol kartasy bekitildi. Jol kartasynyń birinshi kezeńi aıasynda 365,1 mlrd teńge somany quraıtyn 21 jobany júzege asyrý kózdelgen. 2026-2027 jyldary qosalqy stansalardy, sý jınaý torabyn jáne gaz qubyrlarymen qatar, ınjenerlik ınfraqurylymnyń qoldanystaǵy nysandaryn rekonstrýksııalaý men jańa obektiler salý josparlanǵan. 2028-2030 jyldardaǵy ekinshi kezeńde quny – 312,5 mlrd teńge bolatyn 9 joba júzege asyrylady. Onyń ishinde eki qosalqy stansa, avtomattandyrylǵan gaz taratý stansasy bar gaz qubyry, káriz tazartý jáne 49 shaqyrym avtomobıl joldarynyń qurylysy qamtylady.

Prezıdent Alataý qalasyna arnaýly mártebe berý týraly Jarlyqqa qol qoıdy

Tutastaı alǵanda, 2050 jylǵa deıin ınvestısııalardyń jalpy kólemi 10,4 trln teńge deńgeıinde ınfraqurylymdyq jobalar pýly qalyptastyrylǵan, onyń 3,1 trln teńgesin 2030 jylǵa deıin júzege asyrý josparlanyp otyr. Infraqurylymdy damytý bıýdjet qarajaty esebinen ǵana emes, sonymen qatar jeke ınvestısııalar men EPC-kelisimsharttardy tarta otyryp qamtamasyz etiledi.

Sondaı-aq Oljas Bektenovke aldaǵy ýaqytta tartylatyn ınvestısııalar týraly da aqparat usynyldy. Búginde jalpy quny – 1,5 trln teńge bolatyn 32 ınvestısııalyq joba qalyptastyryldy. Atalǵan jobalardyń 20-sy belsendi júzege asyrý satysynda, onyń 8-i – logıstıka, altaýy – qurylys jáne ónerkásip, úsheýi – týrızm, taǵy bir úsheýi – tamaq ónerkásibi salasyn qamtıdy. Bul jobalardy júzege asyrý shamamen 1,2 trln teńge ınvestısııa tartýǵa jáne 22 myńnan astam jumys ornyn ashýǵa múmkindik beredi.

Alataý qalasynda áýe taksı qyzmeti iske qosylady

Iconic Towers jobasyna arnaıy nazar aýdaryldy. Ony salý týraly kelisimge 2025 jyldyń qyrkúıeginde Memleket basshysynyń Qytaıǵa memlekettik sapary aıasynda qol qoıylǵan bolatyn. Investısııa kólemi 800 mln dollardan asady. Arhıtektýralyq tujyrymdamany ázirleý úshin amerıkalyq SOM kompanııasy tartyldy. Keshenniń jalpy aýdany 276,8 myń sharshy metrdi quraıdy jáne oǵan eki munara, keńseler, páterler, qonaq úı men saýda oryndary kiredi. Jobalyq-smetalyq qujattamany ázirleýdi 2027 jyldyń sáýirine deıin aıaqtaý josparlanyp otyr. Qurylys jumystaryn bıyl mamyr aıynda bastap, 2029 jyldyń sońyna deıin aıaqtaý josparlanǵan.

Alataý qalasynyń sáýleti adam ıgiligine qolaıly, bıznes úshin yńǵaıly bolýy kerek

Alataý qalasynyń jobalaryn júzege asyrýǵa baılanysty Almaty oblysynda elektr energııasyn ortasha tutyný kólemi ósip keledi: qazir ol – 750-800 MVt-ty quraıdy. Bul rette 2030 jylǵa qaraı boljamdy ósim – 2 064 MVt, 2050 jylǵa qaraı – 4 164 MVt bolýy múmkin dep baǵalanyp otyr. Qoldanystaǵy qýat kózderiniń tapshylyǵy qosalqy stansalar qurylysy men rekonstrýksııasyn talap etip otyr. Úkimet qazirdiń ózinde 15 qosalqy stansa salý týraly sheshim qabyldady, bul jańa transformatorlyq qýat kólemin iske qosýǵa jáne ınvestorlardy elektr energııasymen qamtamasyz etýge múmkindik beredi.

Alataý qalasy boıynsha bekitilgen Jol kartasy aıasynda shamamen quny – 162 mlrd teńge bolatyn taǵy 11 qosalqy stansa salý jáne rekonstrýksııalaý kózdelgen. Bul – qalanyń turaqty damýy men ınvestısııalyq jobalardy júzege asyrýdyń negizgi sharty.

«Infraqurylym árqashan ozyq qarqynmen damýy kerek, biraq biz sál keshigip kelemiz. Jalpy mundaı másele elimiz boıynsha bar. Qazir Prezıdent buǵan úlken kóńil bólip jatyr. Memleket basshysynyń tapsyrmasy boıynsha Úkimet qajetti qarajatty bóldi. Biz memlekettik qarjyny turaqtandyrý úshin salyq reformasyn júrgizdik. Bul qarajat bizge ınfraqurylymǵa salý úshin qajet. Bul aqsha eshqaıda ketpeıdi, tikeleı ekonomıkaǵa salynady. Eger memleket ınfraqurylymǵa ınvestısııa salsa, onda ınvestorlardyń senimi artyp, elimizge kele bastaıdy. Damý osydan bastalady. Basqa jol joq. Sondyqtan, biz ınvestısııa salamyz jáne osy jyldan bastap bıýdjettiń múmkindikteri basqasha bolady. Birge jumys isteıtin bolamyz», dedi Oljas Bektenov.

Úkimet barlyq qoldaý sharalaryn kórsetip jatyr. Qazirgi ýaqytta qala arnaıy mártebege jáne qosymsha ınstıtýsıonaldyq jaǵdaılarǵa ıe. Oljas Bektenov jergilikti atqarýshy organdardyń nazaryn qalany damytý jónindegi jumysty kúsheıtý qajettigine aýdardy. Prezıdent belgilegen mindetter sheńberinde Alataý búginde iskerlik belsendilik pen ınnovasııanyń jańa ortalyǵy retinde qalyptasyp keledi. Sondyqtan qalanyń sáýleti adam ıgiligine qolaıly jáne bıznes úshin yńǵaıly bolýy tıis. Osyǵan baılanysty Alatau City Authority Qory men Almaty oblysynyń ákimdigine ınjenerlik jáne áleýmettik ınfraqurylymdy damytý, ınvestısııalar tartý, ındýstrııalyq, logıstıkalyq jáne ınnovasııalyq jobalardy júzege asyrý úshin qolaıly jaǵdaılar jasaý máselelerin qarastyra otyryp, qalany damytý boıynsha memlekettik qoldaýdyń jan-jaqty sharalaryn qabyldaý tapsyryldy.

Alataý – zamanaýı ýrbanıstıka úrdisindegi shahar

Tamaq ónerkásibi salasynda Oljas Bektenov ınvestısııalarynyń jalpy kólemi shamamen 360 mln dollar bolatyn PepsiCo Central Asia aýqymdy jobasy boıynsha jumystardyń qarqynymen tanysty. Joba eki kezeńmen júzege asyrylyp jatyr jáne qosylǵan qunnyń jańa tizbegin qalyptastyrýǵa, agroónerkásiptik kooperasııany damytýǵa, aýyl sharýashylyǵy ónimderin saqtaý men óńdeýdiń zamanaýı tehnologııalaryn engizýge baǵyttalǵan. 900-ge deıin jumys ornyn qurý josparlanǵan, kásiporynnyń óndiristik qýaty – 21 myń tonnany quraıdy.

Premer-mınıstr Alataý qalasynda «Mars Petcare Kazakhstan» JShS-niń úı janýarlaryna arnalǵan daıyn azyq óndirý zaýytyna bardy. О́ndiristerdi lokalızasııalaý jáne qaıta óńdeý ónerkásibin damytý saıasaty sheńberinde júzege asyrylyp jatqan joba jyldyń ortasynda bastalady.