Bıyl Memleket basshysy medısına qyzmetkerlerin quqyqtyq qorǵaýdy kúsheıtý týraly zańǵa qol qoıdy. Atalǵan zań Qylmystyq kodekske medısına qyzmetkerlerin, sondaı-aq jedel medısınalyq járdem brıgadalary júrgizýshileriniń ómirine, densaýlyǵyna qaýip tóndirgen azamattardy qylmystyq jaýapkershilikke tartatyn jańa bapty engizýdi kózdeıdi.
Densaýlyq saqtaý mınıstrliginiń málimetinshe, 2019 jyldan beri qaraı elimizde dárigerlerge, feldsherlerge, densaýlyq saqtaý salasynyń ózge de qyzmetkerlerine 280-nen asa shabýyl jasalǵan. Byltyrdyń ózinde ǵana osyndaı 58 derek tirkelip otyr. Mysaly, osydan eki jyl buryn Qostanaı oblystyq jedel medısınalyq járdem qyzmetiniń feldsheri Ánel Baımurzına soqqyǵa jyǵylyp, aýrýhanaǵa jatyp shyqty. О́tken jyly ýrolog-dáriger Anton Kıstanov aýyr soqqy alyp, jansaqtaý bólimine tústi.
Memleket basshysy mundaı keleńsiz oqıǵalardyń «Zań jáne tártip» qaǵıdattary aıasynda qatań jolyn kesýdi tapsyryp otyr. Osyǵan oraı, Qostanaı oblysy densaýlyq saqtaý salasynyń ardagerleri elimizde medısına qyzmetkerlerin qorǵaý maqsatynda iske asyrylyp jatqan dáıekti sharalar men Prezıdenttiń osy baǵyttaǵy aıqyn ustanymyna rızashylyq bildirip otyr.
«Budan bylaı medısınalyq qyzmetkerler men jedel járdem kóliginiń júrgizýshilerine kúsh kórsetip, zorlyq-zombylyq jasaǵan azamattar qatań qylmystyq jaýapkershilikke tartylady. Tipti 12 jylǵa deıin bas bostandyǵynan aıyrylýy múmkin. Men 40 jyl boıy dáriger bolyp jumys istedim. Jumys barysynda keıde ústimizden shaǵym túsip, ókpe-renish aıtylyp jatatyn kezder de boldy. Biz munyń jaqyn adamy úshin shyryldaǵan janashyr jannyń jan ashýy ekenin túsinetinbiz. Alaıda keıingi jyldary medısına qyzmetkerleri kásibı mindetin atqarý barysynda zorlyq-zombylyq kórip, tipti aýyr soqqyǵa jyǵylyp jatqany jasyryn emes. Jany qınalyp jatqan aýyr naýqasqa janushyra jetken áriptesterimizdiń tekten-tek taıaqqa jyǵylyp, aýrýhanaǵa túskenin kórip, talaı ret sharasyzdyqtan janymyz kúıip, ózegimiz órtengen. Dárigerdi qashanda dáriptep, qurmet kórsetip kelgen halyq edik. Biz ózimizge eshqashan erekshe jaǵdaı jasaıtyn mártebe suraǵan emes. Tek qyzmetimizdiń qaýipsiz bolýyn, kópshiliktiń dárigerge syı-qurmetpen qaraýyn qalaımyz. Osy tilegimizdi memleket estise eken degen úmitte júrdik. Bıyl Prezıdentimiz Qasym-Jomart Toqaev qol qoıǵan zań – elimizde medısına qyzmetkerlerine qatysty zorlyq-zombylyqqa eshqandaı jol berilmeıtinin, zańnyń qashanda ústem ekendigin, «Zań jáne tártip» tujyrymdamasynyń qaǵıdalary kezeń-kezeńimen júıeli túrde iske asyrylyp jatqanyn aıqyn kórsetip otyr», deıdi densaýlyq saqtaý salasynyń ardageri, Qazaqstannyń eńbek sińirgen dárigeri Kópeı Malshybaeva.
Qostanaı oblysy