Batys Qazaqstan oblysynda 3 mln teńgeden astam alıment qaryzy bar boryshker ustaldy, dep habarlaıdy Batys Qazaqstan oblysy prokýratýrasynyń baspasóz qyzmeti.
— 2026 jylǵy 6 qańtarda Báıterek aýdandyq soty alıment tóleýden jaltarǵan adamǵa qatysty ákimshilik qamaýǵa alý týraly qaýly shyǵardy. Boryshker 2023 jylǵy 9 qańtardan beri alıment tólemeı kelgen. Osy ýaqyt aralyǵynda onyń alıment boıynsha qaryzy 3 015 447 teńgeni quraǵan, — delingen sot málimetinde.
Báıterek aýdany boıynsha bıylǵy jyly alıment tóleýden jaltarý deregimen bir boryshkerdiń isi sotta qaralyp jatyr, sondaı-aq bir qylmystyq is tergeý satysynda.
Qazaqstan zańnamasyna sáıkes, alıment tóleýden jaltarǵany úshin Qylmystyq kodekstiń 139-babyna saı 2 jylǵa deıin bas bostandyǵynan aıyrý túrindegi qylmystyq jaýapkershilik kózdelgen. Sonymen qatar Ákimshilik quqyq buzýshylyq týraly kodekstiń 669-babynyń 1-bóligine sáıkes, jeke tulǵalarǵa 5 AEK mólsherinde aıyppul salý, 20 saǵatqa deıin qoǵamdyq jumystarǵa tartý nemese 5 táýlikke deıin ákimshilik qamaqqa alý jazasy qoldanylýy múmkin.
Batys Qazaqstan oblysynyń prokýratýrasy ata-analardy balany asyrap-baǵýǵa arnalǵan alıment tólemin ýaqytyly tóleýge shaqyrady. Sebebi árbir ata-ana óz balasy aldynda jaýapty.