Beıjińde týǵan qazaq aktrısasy Rıza Álimjanqyzy Qytaı teleóner salasyndaǵy eń bedeldi marapat «Flying Apsaras Awards» syılyǵyn jeńip aldy. Ol «Minning Town» telehıkaıasyndaǵy róli úshin «Úzdik aktrısa» atandy. Atalǵan drama 2021 jyldyń qańtar aıynda Qytaıdaǵy bes iri telearnadan kórsetilip, kórermen tarapynan joǵary baǵalandy.
Qazaq qyzy túsken telehıkaıada Nıńshııa avtonomııaly ólkesiniń Sıhaıgý óńirindegi aýyl turǵyndarynyń kúresi, tynys-tirshiligi sýrettelgen. Rıza atalǵan shyǵarmada óz bolashaǵy úshin baryn salǵan, aıanbaı kúresken batyl qyz Lı Shýıhýanyń beınesin sátti somdaǵan. Beıjińdegi «Shougang Arena» kesheninde ótken marapattaý rásiminde Rıza Álimjanqyzy sóz alyp, bylaı dedi: «Men baqytty janmyn ári ózimdi jolym bolǵan aktrısa dep oılaımyn. Azyn-aýlaq eńbegimdi baǵalaǵan qazylar alqasyna, kórermenderge alǵysym sheksiz. Alǵysymdy týǵan tilimde aıtqym keledi», deı kele alyp sahnada qazaq tilinde «sizderge rahmet!» degeni jurtty tamsandyrdy.
Rıza Álimjanqyzy – «Flying Apsaras Awards» syılyǵy tarıhynda «Úzdik aktrısa» ataǵyn alǵan tuńǵysh qazaq. Teleóner salasynda keremet jetistikterge jetken ol 2002 jyly Beıjiń kınoakademııasyn támamdap, kásibı aktrısa atandy. Osyǵan deıin «Bizge ǵana málim meken», «Hen Hýan Chýan ǵıbadathanasy», «Mahabbatqa ámir júrmeıdi» sııaqty fılmderde oınaǵan.
2017 jyly Rıza Álimjanqyzy XX Shanhaı halyqaralyq kınofestıvalinde «Umtylys» fılmindegi róli úshin «Kórermen unatqan aktrısa» atalymyn ıelengen. Al 2019 jyly «Chań Án kúni» telehıkaıasyndaǵy róli úshin «Huading» baıqaýynda «Úzdik aktrısa» tanylǵany bar.