Jergilikti jerlerde kásipkerlikke den qoıyp, belgili bir ispen tyńǵylyqty shuǵyldanyp júrgen adamdarǵa memleket tarapynan kórsetilip jatqan qoldaý kóp. Sonyń ishinde «Aýyl amanaty» baǵdarlamasyn aýyz toltyryp aıtýǵa bolady.
Osy baǵdarlamanyń arqasynda sharýasyn shalqytyp otyrǵan azamattar az emes óńirde. Jalpy, bıyl Shyǵys Qazaqstan oblysynda «Aýyl amanaty» arqyly 115 joba resimdelip, oǵan qazynadan 1,5 mlrd teńge qarjy bólingen.
«Qazir el burynǵydaı emes, jumys joq dep qol qýsyryp otyrmaıdy. Túkpirdegi aýyl azamattary da kásiptiń kózin izdep, nápaqa tabýdy jan-jaqty oılastyrýǵa tyrysady. Biri týrızmdi túletkisi kelse, endi biri mal ósirýdi qolǵa alyp, et, sút ónimderin shyǵaryp jatyr. Qonaqúı ashyp jatqandar da bar. Bul oraıda bizdiń partııa tarapynan kórsetilip jatqan qoldaý qomaqty», deıdi «Amanat» partııasy ShQO fılıaly baspasóz qyzmetiniń jetekshisi Táttimbet Ashanuly.
«Aýyl amanaty» baǵdarlamasy shynynda da aýyl kásipkerlerine jańa múmkindikter ashyp otyr. Qarjylaı kórsetilgen qoldaý kásibin endi bastaǵan azamattarǵa óte yńǵaıly. Qajetti qujattardy jınastyryp, belgili erejelerge saı bolsa bolǵany. Glýbokoe aýdany Beloýsovka kentiniń turǵyny osy baǵdarlamanyń arqasynda armanyn shyndyqqa aınaldyrypty. Ertede ol et ónimderin túrlendirip, satýdy oılastyrǵan. Jobasy oıda júrgenimen, júzege asý-aspaýy ekitalaı edi. Alaıda baǵdarlamaǵa qatysqan kásipker Amantaı Tankaev búginde isin dóńgeletip, jergilikti naryqta joǵary suranysqa ıe ónim shyǵaryp otyr. Ol otbasylyq sharýashylyǵyn damytýǵa, et ónimderin qaıta óńdeý isin jolǵa qoıýǵa nıettenip, «Amanat» partııasynyń aýdandyq fılıalyna, sondaı-aq aýdandyq kásipkerlik jáne aýyl sharýashylyǵy bólimine júgingen eken. Qoldaý tapqan joba jeńildetilgen nesıe arqyly qarjylandyrylyp, kásipker zamanaýı qural-jab- dyq satyp alýǵa múmkindik aldy.
Búginde ol jubaıymen birge qaqtalǵan, vakýýmdalǵan qazy, jaıa, shujyq túrlerin óndirýdi jolǵa qoıdy.
«Aýyl amanaty» baǵdarlamasy bolmasa, mundaı jobany iske asyrý áldeqaıda qıynǵa túser edi. Qazir óndiristi keńeıtý josparyn qolǵa alyp jatyrmyz. Jurtshylyq bizdiń ónim óz sharýashylyǵymyzdan shyqqan tabıǵı ári taza taǵam ekendigin biledi. Sondyqtan suranys kún sanap artyp keledi», deıdi A.Tankaev.
Bir sózben aıtqanda, «Aýyl amanaty» baǵdarlamasy aýyldaǵy kásipkerlikti damytýǵa, turǵyndardyń tabysyn arttyrýǵa, óńirlik ekonomıkany nyǵaıtýǵa baǵyttalǵan tıimdi bastama ekendigin jan-jaqty dáleldep keledi.
Shyǵys Qazaqstan oblysy,
Glýbokoe aýdany