Saýda jáne ıntegrasııa mınıstri Arman Shaqqalıev Berlındegi Grüne Woche kórmesinde Qazaqstannyń Ulttyq pavılonyn ashty.
Grüne Woche kórmesi 1926 jyldan beri ótkizilip keledi. Onda álemniń túkpir-túkpirinen kelgen elder ózderinde óndirilgen aýyl sharýashylyǵy ónimderin usynady. Sonyń aıasynda otandyq óndirýshiler tájirıbe almasýǵa, ózgeniń ónimin synap kórýge, tikeleı iskerlik baılanystar ornatýǵa, eýropalyq naryq talaptaryn tereń túsinýge múmkindik alady.
Vedomstvonyń dereginshe, 16–25 qańtar aralyǵynda ótetin kórme kezinde mınıstr Arman Shaqqalıev bastaǵan delegasııa «Jasyl apta» aıasyndaǵy agrarlyq saıasat, bıznes pen halyqaralyq uıymdar ókilderin biriktirgen negizgi is-sharalarǵa qatysqan.
Kórmedegi basty oqıǵanyń biri – Qazaqstannyń Ulttyq pavılonynyń ashylýy boldy. Pavılon iskerlik dıalog alańy retinde qyzmet atqaryp, eksporttyq áleýetti tanystyrýǵa, ónerkásiptik kooperasııanyń keleshegin talqylaýǵa múmkindik berdi.
Ekspozısııada otandyq aýyl sharýashylyǵy ónimderin óndirý, zamanaýı agrotehnologııalardy engizý jáne agrojúıelerdi damytý baǵytynda qolǵa alynǵan jumystar keńinen tanystyryldy. «Pavılon Germanııa jáne basqa da halyqaralyq seriktester tarapynan joǵary qyzyǵýshylyq týdyryp, ónimderimiz ben birlesken jobalarǵa degen suranystyń artyp kele jatqanyn dáleldedi», deıdi mınıstrlik ókilderi.
GFFA aıasynda Arman Shaqqalıev birqatar halyqaralyq áriptestermen ekijaqty kezdesýler ótkizdi. Atap aıtqanda, Germanııanyń Azyq-túlik, aýyl sharýashylyǵy jáne óńirlik sáıkestik jónindegi federaldyq mınıstri Aloıs Raınermen, Germanııanyń Ekonomıka jáne energetıka federaldyq mınıstrliginiń stats-hatshysy Tomas Shtefenmen, Nemis ekonomıkasynyń Shyǵys komıtetiniń atqarýshy dırektory Mıhael Harmspen, sondaı-aq Dúnıejúzilik saýda uıymy Bas dırektorynyń orynbasary Jan-Marı Paýgammen kelissózder júrgizdi. Taraptar saýdany keńeıtý, kedergilerdi azaıtý, azyq-túlik jetkizý tizbekteriniń turaqtylyǵy men ózara naryqtardaǵy baılanystardy kúsheıtý máselelerin talqylady.
Kelissózderdiń jeke blogi agrarlyq yntymaqtastyq pen tehnologııalyq áriptestikti damytýǵa arnaldy. Otandyq delegasııa Pákistannyń Ulttyq azyq-túlik qaýipsizdigi jáne zertteýler jónindegi federaldyq mınıstri Rana Tanvır Hýsseınmen, Germanııanyń Aýyl sharýashylyǵy federaldyq mınıstrliginiń memlekettik hatshysy Markýs Shıkpen, Nemis agrobıznes alıansynyń dırektory Per Broderzenmen, basqa da laýazymdy tulǵalarmen mazmundy kelisimder jasady. Júzdesý barysynda óndiristi órkendetý, aýyl sharýashylyǵy tehnıkasyn jańǵyrtý, nemis sapa standarttaryn engizý, tuqym sharýashylyǵyn damytý men sý únemdeý máselesi basty nazarda boldy.
Elimizdiń delegasııasy Nemis agrobıznes alıansy uıymdastyrǵan salalyq pikirtalastarǵa da belsendi qatysty. Onyń ishinde sýdy ysyrapsyz paıdalaný men ınnovasııalyq agrotehnologııalarǵa arnalǵan paneldik sessııaǵa ún qosty.
Is-sharalar barysynda Qazaqstan men Germanııa arasyndaǵy saýda-ekonomıkalyq baılanystardyń nyǵaıyp kele jatqany atalyp ótti. 2025 jyldyń qańtar-qarasha aılarynyń qorytyndysy boıynsha eki el arasyndaǵy taýar aınalymy 3,91 mlrd dollardy qurady. Qazaqstannyń Germanııaǵa eksporty 7,9 paıyzǵa ósip, 1,17 mlrd dollarǵa jetti. Bul nemis naryǵynyń otandyq jetkizýshiler men jergilikti ónimderge degen qyzyǵýshylyǵyn kórsetedi.