Qyzylordada V Ulttyq quryltaı aıasynda «Áleýmettik-mádenı damý» seksııasynyń otyrysy ótti. Otyrys jumysyna Premer-mınıstrdiń orynbasary – Mádenıet jáne aqparat mınıstri Aıda Balaeva tóraǵalyq etti. Talqylaýǵa Parlament depýtattary, shyǵarmashylyq zııaly qaýym ókilderi jáne qoǵam qaıratkerleri qatysty, dep jazady Egemen.kz.
Jıyndy ashqan Aıda Balaeva Ulttyq quryltaıdyń qoǵam úshin mańyzy zor, turaqty ári júıeli dıalog alańyna aınalǵanyn atap ótip, onda el damýynyń uzaqmerzimdi baǵyt-baǵdary aıqyndalyp, ózekti áleýmettik máseleler keńinen talqylanatynyn jetkizdi.
«Ulttyq quryltaı aıasynda aıtylǵan barlyq usynys pen pikir Memleket basshysy men memlekettik organdardyń erekshe baqylaýynda. Mádenıet jáne aqparat mınıstrligi quryltaı músheleri usynǵan bastamalardy iske asyrý josparynyń oryndalýyna turaqty túrde monıtorıng júrgizip keledi. Aldyńǵy tórt otyrysta asa mańyzdy máseleler kóterilip, aýqymdy jumys atqaryldy. Atap aıtqanda, zańnamany jetildirý maqsatynda 26 zań qabyldandy. Sonymen qatar 10 zań jobasyna, sondaı-aq Prezıdent jarlyqtary men keshendi damý josparlaryna ózgerister engizý boıynsha jumystar júrgizilip jatyr», dedi Premer-mınıstrdiń orynbasary.
Seksııa otyrysyna qatysýshylar óz usynystary men bastamalaryn ortaǵa saldy. Talqylaýdyń negizgi ózegin mádenıetti damytý, kreatıvti ındýstrııalardy damytý, áleýmettik salany jaqsartý jáne otbasy qundylyqtaryn nyǵaıtý máseleleri qurady.
Jumys toby jańa Parlamentke qatysty máselelerdiń barlyq qyryn qarastyrdy
Sondaı-aq balalar kontentin damytý jáne anımasııa ındýstrııasyn órkendetý taqyryby kóterildi. Osyǵan baılanysty Aıda Balaeva mýltfılm óndirisine arnaıy toqtalyp, bul baǵyttyń mańyzdylyǵyn erekshe atap ótti.
«Prezıdent Joldaýynda berilgen tapsyrmaǵa sáıkes, mınıstrlik janynan Kreatıvti ındýstrııalardy qoldaý qory quryldy. Qazirgi ýaqytta onyń materıaldyq-tehnıkalyq bazasy qalyptastyrylyp jatyr, ári qor qurylymynda anımasııaǵa arnalǵan jeke baǵyt qarastyrylady. Meniń oıymsha, munda sannan buryn sapaǵa mán berý mańyzdy. Kontenttiń bala psıhologııasyna yqpalyn, jas erekshelikterin jáne tárbıelik áserin mindetti túrde eskerý qajet. Qordyń tolyqqandy jumysy bastalǵannan keıin anımasııa ındýstrııasy tyń serpin alyp, qarqyndy damı túsedi dep senemin», dep atap ótti Mádenıet jáne aqparat mınıstri.
Basqa da máselelerdi talqylaý barysynda qatysýshylar men sarapshylar ulttyq dástúrdi saqtaý jáne «kitap oqıtyn ult» qalyptastyrý – Qazaqstan qoǵamyn jańǵyrtýdyń mańyzdy quramdas bóligi ekenin basa aıtty. Osyǵan oraı Aıda Balaeva aýdarýǵa jáne basyp shyǵarýǵa usynylatyn kitaptar tizbesin aıqyndaıtyn arnaıy komıssııa qurýdy usyndy. Sonymen birge zamanaýı jas avtorlardyń shyǵarmalaryn el kitaphanalarynyń qoryna júıeli túrde engizý qajettigine nazar aýdardy.
Toqaev: Konstıtýsııalyq reformanyń talqylana bastalǵanyna jarty jyl bolyp qaldy
Búgin Qyzylordada «Bilim jáne ǵylym», «Azamattyq qoǵam» jáne «Ekonomıkalyq damý» baǵyttary boıynsha taǵy úsh seksııada talqylaýlar ótip jatyr. Eki kún boıy memlekettik saıasattyń ózekti máseleleri talqylanatyn bolady.
Toqaev: Konstıtýsııanyń birden birneshe bólimin qaıta qaraý qajet bolady
Al erteń, ıaǵnı 20 qańtarda, Memleket basshysynyń qatysýymen V Ulttyq quryltaıdyń plenarlyq otyrysy ótedi. Is-sharaǵa Qazaqstannyń barlyq óńirinen delegat retinde kelgen Ulttyq quryltaıdyń 110 múshesi qatysady.