Memleket basshysy Qasym-Jomart Toqaev Ulttyq quryltaıdyń V otyrysynda sóz sóıledi. Prezıdent óz sózinde Ulttyq quryltaı aýqymdy reformalardyń negizgi qozǵaýshy kúshi bolǵanyn atap ótti, dep jazady Egemen.kz.
«Osy rette, Ulttyq quryltaı aıryqsha ról atqarǵany sózsiz. Tórt jylda quryltaı músheleri el ómirine yqpal etetin kóptegen mańyzdy bastama kóterdi. Ulttyq quryltaıda aıtylǵan usynystardyń negizinde 26 zań qabyldandy. Osynyń ózi Quryltaı aýqymdy reformalardyń negizgi qozǵaýshy kúshi bolǵanyn aıqyn kórsetedi. Áıelderdiń quqyǵy men balalardyń qaýipsizdigin qamtamasyz etý úshin naqty qadamdar jasaldy. Lýdomanııaǵa, ıaǵnı oıynqumarlyqqa jáne nashaqorlyqqa qarsy belsendi kúres júrgizile bastady. Onomastıka salasyndaǵy jumystar retke keltirildi. Memlekettik nagradalar júıesine jańadan qurmetti ataqtar engizildi. Sol arqyly eńbek adamdarynyń mártebesi arta tústi.
Budan bólek biz ulttyń jańa sapasyn qalyptastyratyn basty qundylyqtarymyzdy aıqyndap aldyq. Urpaqtyń bolashaǵyna zııanyn tıgizetin keselderge barynsha tosqaýyl qoıatyn boldyq. Quryltaı músheleri ótken jylǵy jıynda ishki saıasat salasyn retke keltirý týraly bastama kóterdi. Tıisti qujatty ázirleýge ózderińiz belsene atsalystyńyzdar.
Byltyr Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttary bekitildi. Endi, osy qujatty basymdyq retinde qarap, belsendi túrde iske asyrýymyz kerek», dedi Qasym-Jomart Toqaev.
Sonymen qatar Prezıdent neke ınstıtýtyn er men áıeldiń erikti odaǵy retinde zańnamalyq turǵydan bekitý týraly oıyn aıtty.
Kisi qolynan qaza tapqan Nuraıdyń basynda bolǵan jaǵdaıǵa da asa mán berdi.
Buǵan deıin Qasym-Jomart Toqaev Aral teńizi máselesine qatysty pikir bildirip, ony saqtaý búkil adamzat úshin ózekti mindet ekenin aıtqan bolatyn.