Shymkent qalasynyń ákimi Ǵabıt Syzdyqbekov 2025 jyldy qorytyndylaǵan brıfıngte jýrnalıstiń kommýnaldyq másele tóńireginde qoıǵan saýalyna keleshekte bul qyzmet fransýzdyq kompanııaǵa senimgerlik basqarýǵa beriletinin aıtqan, dep habarlaıdy Egemen.kz.
Jýyrda ákim orynbasary Berik Berkimbaev kommýnaldyq jáne ınjenerlik ınfraqurylymdy basqarý salasyndaǵy fransýzdyq «Veolia» kompanııasynyń ókilderimen kezdesti. Basqosýda taraptar zamanaýı tehnologııalar engizý, kommýnaldyq qyzmetter sapasyn jaqsartý, qalalyq ınfraqurylymdy jańartýǵa baılanysty ınvestısııalyq jobalardy birlesip júzege asyrý máselesin talqylady.
Kezdesý sońynda «Veolia», Shymkent qalasynyń ákimdigi, «Qazaqstandyq turǵyn úı-kommýnaldy sharýashylyqty jańǵyrtý jáne damytý ortalyǵy» AQ arasynda ózara túsinistik týraly memorandýmǵa qol qoıyldy. Kelisim jylýmen qamtý, sýmen jabdyqtaý, sý burý júıelerin tıimdi basqarý men jańartý maqsattaryn kózdeıdi.
Birlesken joba nátıjesinde qala ınfraqurylymy, energııa únemdeıtin tehnologııalar jaqsarady, megapolıstiń turaqty damýyna jaǵdaı jasalady degen boljam bar.
Jalpy «Veolia» kompanııasynyń shtab-páteri Parıj qalasynda ornalasqan. Eýropa, Azııa memleketterinde, AQSh-ta jobalardy júzege asyrady. Ekologııalyq zamanaýı tehnologııalar qoldana otyryp, kommýnaldyq, ónerkásiptik nysandarǵa qyzmet kórsetedi.
Eger shynymen de kommýnaldyq qyzmet fransýzdyq kompanııanyń senimgerlik basqarýyna ótse, bıýdjetke qarasty «Qýatjylýortalyq» mekemesi men sýmen jabdyqtaý salasyndaǵy basqarýshy kompanııa aýysýy múmkin. Bul jerde áńgime «Sý resýrstary - Marketıng» JShS tóńireginde bolyp otyr. Atalǵan kompanııanyń sýmen jabdyqtaý qyzmetin memleketke keri qaıtarý úshin qalalyq ákimdik áli kúnge sheıin sottasyp keledi.