Byltyr el kitaphanalaryna mıllıondaǵan oqyrman kelgen. Aıta keteıik, búginde respýblıkada jalpy qory 72,5 mln-nan astam saqtaý birligi bar 3 887 qoǵamdyq kitaphana jumys isteıdi. Jyl ishinde oqyrmanǵa ártúrli taqyryptaǵy 88 mln-nan astam materıal berildi.
2024 jylmen salystyrǵanda turaqty paıdalanýshylar sany 4,1 % artyp, 5 mln-nan astam adamǵa jetti. Oqyrman Túrkistan, Jambyl, Pavlodar oblystarynda kóp tirkelgen.
Kitap oqýǵa degen qyzyǵýshylyqtyń artýy kelýshiler sanynyń kóptiginen aıqyn baıqalady. Byltyr kitaphanalyq qyzmetke júginý kórsetkishi rekordtyq deńgeıge jetip, jalpy sany 57 mln ret kelý kórsetkishi tirkeldi. Sonymen qatar merzimdi basylymdarǵa degen suranys kóp. Bir jyl ishinde Ulttyq kitaphanaǵa gazetter men jýrnaldar boıynsha 1 mln-nan astam suranys tústi.
Iá, kitaphanalarǵa eń kóp kelýshiler – jastar. Almaty qalasyndaǵy Ulttyq kitaphanada oqyrmandardyń eń kóp bóligin 17–25 jas aralyǵyndaǵy jastar, odan keıin 12–18 jas aralyǵyndaǵy jasóspirimder quraıdy. Suranysqa ıe ádebıetterdiń qatarynda kórkem shyǵarmalar, tarıh pen etnografııaǵa arnalǵan basylymdar, ǵylymı-kópshilik, psıhologııalyq jáne medısınalyq kitaptar, sondaı-aq jańa tehnologııalar týraly basylymdar bar.
Kitaphanalar oqyrmanmen jumys júrgizýmen qatar, mádenı ómirdiń mańyzdy ortalyǵy retinde de erekshe ról atqarady. Bir jyl ishinde kitaphanalarda 258 myńnan astam mádenı-aǵartýshylyq is-shara ótti. Sonymen qatar ınfraqurylym men sıfrlyq servısterdi damytý jumystary qatar júrgizilip otyr. Ulttyq kitaphanada elektrondy resýrstar qoljetimdi bolý úshin ınterfeıs jańartyldy. Ulttyq akademııalyq kitaphana «Air Astana» áýe kompanııasymen birlesip «Áýe qanatynda» jobasyn júzege asyrdy. Al Shyǵys Qazaqstan oblysynda kitaphanashylardyń jumysyn ońtaılandyrý maqsatynda «DosAI» neıroassıstenti alǵash ret iske qosyldy.
Budan bólek Sábıt Muqanov atyndaǵy Soltústik Qazaqstan oblystyq kitaphanasynda oqyrmandarǵa qyzmet kórsetý sapasyn arttyrýǵa, sıfrlyq baılanysty kúsheıtýge baǵyttalǵan «AI Zhan» assıstenti engizildi.
Kitaphanalar jelisin damytý basqa óńirlerde de jalǵasyn tapty. Qyzylorda oblysynda «Rýhanııat» ortalyǵy paıdalanýǵa berilse, Batys Qazaqstan oblysynda 25 aýyldyq kitaphanany jańǵyrtýǵa arnalǵan qanatqaqty joba júzege asty. Bul bastamalardyń barlyǵy kitaphanany oqyrmanǵa jaqyndatyp, zamanaýı mádenı-aǵartýshylyq ortalyqqa aınaldyrýdy maqsat etedi.