Qazaq tarıhyndaǵy Quryltaı jıyndary qashanda el ishindegi aıryqsha betburys pen ózgeriske ákelgen. Memleket basshysy Qasym-Jomart Toqaevtyń bastamasymen qaıta jańǵyrǵan Ulttyq quryltaı otyrystary da sol dástúrdiń zańdy jalǵasy retinde túıtkildi máselelerdiń túıinin tarqatýǵa túrtki bolyp keledi. Osy oraıda biz birqatar quryltaı múshesine «Bul basqosý el ómirine qandaı ózgeris ákeledi?» degen suraq qoıyp, pikirin bilgen edik.
Amanjol ÁLTAI,
Májilis depýtaty:
– Quryltaıdyń salmaǵy sózdiń kóptigimen emes, iske asyrylǵan nátıjelermen ólshenedi. Osy turǵydan alǵanda, buǵan deıingi otyrystarda aıtylǵan usynystar negizinde 26 zań qabyldanǵany barshaǵa málim. Bul – qoǵamdyq talqylaýdyń quqyqtyq sheshimge aınala alatynyn, eldik máselelerdiń qaǵaz júzinde qalyp qoımaı, naqty normalarǵa aınalýǵa qabiletti ekenin kórsetetin belgi.
Prezıdent Qyzylordaǵa kelip turyp, Aral problemasyn aıtpaı ketýge bolmaıtynyn tilge tıek etip, sý resýrstary máselesi kún tártibinde strategııalyq deńgeıge kóterilgenin eske saldy. Soltústik Araldy saqtap qalý tájirıbesin jalǵastyryp, Kókaral bógetiniń deńgeıin arttyrý jobasyn bıyl bastaý kózdeletini aıtyldy. Sý problemasy shekaramen shektelmeıtinin qaperge alǵan Memleket basshysy sý dıplomatııasynyń mańyzyn atap ótti, al óńirlik ýaǵdalasý Kaspıı, Balqash, Ertis sııaqty júıelerdiń bolashaǵyna da tikeleı áser etetinin qadap aıtty. Sáýir aıynda Astanada ótetin halyqaralyq ekologııalyq sammıt osy baǵyttaǵy aldaǵy qadamdardy naqtylaıtyn alań bolmaq.
Raıymbek BATALOV,
«Atameken» UKP basqarma tóraǵasy:
– Prezıdent Abaıdyń «Tolyq adam» ıdeıasymen tyǵyz astasyp jatqan «Adal azamat» tujyrymdamasyna aıryqsha mán berdi. Bul – jaı ǵana abstraktili pálsapa emes, adal eńbekti, zańǵa qurmet pen jaýapkershilikti qoǵam úshin damýdyń basty tetigi retinde qarastyratyn qundy irgetas. Bıznes úshin bul adaldyqty, ashyqtyq pen jaýapkershilikti básekeli artyqshylyq retinde usynatyn kásipkerliktiń jańa mádenıetine ótýdi bildiredi. Turaqty ekonomıka men memleket, bıznes, qoǵam arasyndaǵy senimniń negizinde osyndaı qaǵıdattar jatyr.
Osy oraıda Prezıdenttiń buǵan deıingi Quryltaı otyrystarynda bergen tapsyrmalaryna saı «Atameken» UKP «adal ekonomıkany» qalyptastyrýdyń júıeli jumystaryn qolǵa aldy. Bul jerde kásipkerdiń adal nıeti – onyń basty artyqshylyǵy, al salyq reformasy ashyqtyq, teń múmkindikter berý men josyqsyz tájirıbelerden bas tartý qaǵıdattarymen qatar júredi.
Prezıdent kásipkerler men azamattardyń dıalogi men pikirin esepke alatyn «janjalsyz fıskaldyq tranzıt» pálsapasyn alǵa tartqany belgili. Bul turǵyda «Atameken» UKP kodeksti daıyndaýǵa belsendi túrde qatysty ári qazir de týyndaǵan máselelerdi memlekettik organdarmen birge talqylap keledi. Sonyń arqasynda salyqtyq ákimshilendirýdiń servıstik modelin engizip, eseptilikti qysqartýǵa qol jetkizildi. Biz úshin salyq saıasaty bıznestiń damýyna túrtki bolýmen qatar, aǵymdaǵy ekonomıkalyq jaǵdaıǵa sáıkes bolǵany mańyzdy. Sondyqtan múddeler teńdigi men fıskaldyq júıeniń turaqtylyǵyn qamtamasyz etý maqsatynda memlekettik organdarmen, kásipkerlermen jumysty jalǵastyra beremiz.
Nurlybek ÁLMAǴAMBETOV,
Qostanaı oblysy Amangeldi aýdandyq máslıhatynyń tóraǵasy:
– Qyzylorda qalasynda Memleket basshysy Qasym-Jomart Toqaevtyń tóraǵalyǵymen ótken Ulttyq quryltaıda halyq qamy, memleket múddesi turǵysynda kóptegen keleli másele kóterildi. Jyldar ótken saıyn táýelsizdigimizdiń tuǵyrly bolyp, el ekonomıkasynyń damyp jatqanyn kórip otyrmyz. Halyqtyń turmys-tirshiliginiń jaqsarǵanyn, shetelderge baryp júrgenimizde salystyra otyryp baǵalaısyń. Bunyń bári – memlekettik saıasattyń durys jolǵa qoıylyp otyrǵanynyń dáleli.
Qyzylorda quryltaıynda Prezıdent: «Kez kelgen jaǵdaıda patrıotızmdi nyǵaıtýǵa tyrysý qajet jáne memlekettik sımvolıkany – týymyzdy, eltańbamyzdy, kólikterde, úılerde, kóshelerde jáne elimizde nemese shetelde ótetin sporttyq jáne basqa da is-sharalarda durys paıdalaný mańyzdy», dedi. Prezıdentimizdiń bul sózi árbir azamattyń oıynda bolyp, kók týymyzdyń ashyq aspanda máńgi jelbirep turýy úshin árqaısymyz táýelsiz elimizdiń laıyqty azamaty bola bileıik, adal eńbek eteıik degim keledi.
Daıyndaǵan –
Eskendir ZULQARNAI,
«Egemen Qazaqstan»