Almaty oblysynda bilim salasyn sıfrlandyrý jáne jasandy ıntellekt quraldaryn oqý úderisine engizý baǵytynda tájirıbelik trenıng ótti.
Ile aýdanyndaǵy №53 orta mektep bazasynda ótken «EdTech & AI: Innovasııa jáne ıntegrasııa» taqyrybyndaǵy is-shara Parlament Májilisi men «Amanat» partııasy tóraǵasynyń hattamalyq tapsyrmalaryna sáıkes «Daryn.ai» platformasynda muǵalimderge arnalǵan jasandy ıntellekt kýrsyn iske asyrý aıasynda uıymdastyryldy. Bul bastamaǵa Almaty oblysynyń bilim basqarmasy uıytqy boldy.
Is-sharanyń ashylýynda oblystyq bilim basqarmasynyń basshysy Araılym Tóleýbekova jasandy ıntellektiniń bilim júıesindegi strategııalyq mańyzyna toqtalyp, onyń sapaly bilim berýdegi rólin atap ótti.
«Jasandy ıntellektini tıimdi qoldaný – ýaqyt talaby ǵana emes, sapaly bilimniń basty kepili. Bul baǵytta muǵalimderdiń kásibı daıyndyǵy men zamanaýı kózqarasy sheshýshi mánge ıe», dedi ol.
Tájirıbelik trenıngke oblystyq bilim basqarmasynyń ókilderi, ádistemelik ortalyq mamandary, aýdan jáne qala bilim bólimderiniń basshylary, bilim uıymdarynyń dırektorlary, sondaı-aq «eData.kz», «Bilim Media Group (Bilimland)», «Daryn.AI» jáne «Almatykitap» kompanııalarynyń ókilderi qatysty. Sonymen qatar «Daryn.ai» platformasy arqyly kýrstan ótip, óz jobalaryn ázirlegen pedagogter de tájirıbecimen bólisti.
Trenıngtiń negizgi maqsaty – pedagogterge jasandy ıntellekt quraldaryn paıdalana otyryp, oqý úderisin jekelendirý, daralap oqytý, kásibı tájirıbe almasýǵa múmkindik jasaý. Tanystyrylym alańynda tehnologııalyq kompanııa ókilderi TEDx formatynda ózderiniń ınnovasııalyq sheshimderi men usynystaryn aıtyp, bilim salasyndaǵy yntymaqtastyqty nyǵaıtýǵa baǵyttalǵan oı-pikirin ortaǵa saldy.
Sıfrlyq tehnologııalardy bilim júıesine engizý – oqytý sapasyn arttyrýdyń mańyzdy tetiginiń biri. Osy baǵytta elimizde jasandy ıntellektige negizdelgen zamanaýı platformalardy bilim uıymdaryna beıimdep, tıimdi qoldanysqa engizý jumystary júrgizilip keledi. Atalǵan bastamanyń mańyzy men júzege asyrylý barysy týraly «eData.kz» kompanııasynyń dırektory Sanjar Kenjehan tilge tıek etti.
«Biz – «eData.kz» kompanııasy elimizdegi «Google», «Canva», «Quizizz ai» degen kompanııalardyń resmı ókilimiz. Bul qurylǵylar jasandy ıntellekt negizinde jumys isteıdi. Ol bilim salasynyń mamandary, muǵalimder men oqýshylarǵa keńeıtilgen múmkindik beredi. Bul – qujat aınalymyn avtomattandyrýdan bastap, ishki oqý úderisterin ońtaılandyrý jáne oqýshylarǵa jekeshelendirilgen bilim arqyly bilim sapasyn kóterýge baǵyttalǵan biryńǵaı ekojúıe. Sol úshin Almaty oblysynda qala mektepteri men aýyl mektepterindegi bilim sapasyn teńestirý maqsatynda jumys istep jatyrmyz. Respýblıka boıynsha bul platformalarǵa 13 oblys qosylǵan. Sonyń ishinde endi Almaty oblysy da bul tizimge enip otyr», deıdi S.Kenjehan.
Al oblys ustazdary ózderiniń avtorlyq jobalaryn tanystyryp, jasandy ıntellektini sabaq barysynda tıimdi qoldaný joldaryn naqty mysaldar arqyly kórsetti. Qatysýshylar sıfrlyq bilim resýrstarynyń múmkindikteri men táýekelderi, «EdTech» salasyndaǵy zamanaýı trendter jáne JI quraldaryn oqý úderisine ıntegrasııalaý máseleleri boıynsha pikir almasty.
Almaty oblysy