Aqtóbe qalasyndaǵy №65 orta mekteptiń 11-synyp oqýshysy Aısáýle Jumabaı qańtar aıynda ótken Ulttyq biryńǵaı testileýdiń synaq kezeńinde 138 upaı jınap, eń úzdik nátıjege qol jetkizdi, dep habarlaıdy Egemen.kz.
Oblystyq bilim basqarmasynyń habarlaýynsha, zerdeli de tárbıeli oqýshy bastaýysh synyptardan bastap tııanaqtylyǵymen, uqyptylyǵymen kózge túsip, osyǵan deıin túrli zııatkerlik baıqaýlar men olımpıadalarǵa belsendi qatysqan. Ol kúzde aǵylshyn tili boıynsha mektep oqýshylary arasynda ótken respýblıkalyq olımpıadanyń qalalyq jáne oblystyq kezeńderinde júldeli oryndar ıelenip, matematıka páni boıynsha olımpıadada da úzdik nátıjeler kórsetti. Bos ýaqytynda qazaq qalamgerleriniń klassıkalyq týyndylaryn oqýdy unatady.
«Ádebı shyǵarma qarym-qatynas mádenıetin úıretedi, qorshaǵan ortany, adamdardy túsinýge kómektesedi. Kitap ómirdegi arman-maqsatyńa jetýdiń kiltin ashady, bolashaq mamandyǵyńdy tańdaýǵa járdemdesedi. Oqyp bolǵan soń shyǵarmadaǵy keıipkerdiń áreketine qarap, qandaı sheshim qabyldaýdyń durystyǵy týraly oılanasyń», deıdi ozat oqýshy.
Bos ýaqytynda UBT-nyń negizgi pánderine daıyndyq sabaqtaryna qosa, óz mektebinegi «tarıh mektebi» fakýltatıvine qatysyp, bilimin pysyqtap júrgen Aısáýleniń alǵyrlyǵyna ustazdary da rıza. Bilgenin synyptastaryna úıretýden jalyqpaıdy.
«Kishkentaıynan tálim-tárbıe bergen oqýshyń mekteptiń bergen bilimin jarqyratyp kórsetip jatsa, bul pán muǵalimderi úshin úlken abyroı», deıdi qatardaǵy qazaq mektebiniń muǵalimderi.
Aqtóbe oblysy