Astanada medısınalyq uıym arqyly áleýmettik medısınalyq saqtandyrý qorynyń qarjysyn zańsyz ıemdený deregi boıynsha aıyptaý úkimi shyqty. Qylmystyq is top bolyp, aldyn ala sóz baılasý arqyly, qyzmettik jaǵdaıdy paıdalanyp jasalǵan alaıaqtyq faktilerine qatysty qaraldy, dep jazady Egemen.kz.
Qalanyń qylmystyq ister jónindegi aýdanaralyq soty 2026 jylǵy 21 qańtarda azamattar N. men A.-ǵa qatysty úkim jarııalady. Tergeý barysynda N.-nyń medısınalyq uıymnyń quryltaıshysy retinde 2023 jylǵy sáýir men shilde aralyǵynda azamattardy óz klınıkasyna jalǵan tirkeý shemasyn uıymdastyrǵany anyqtaldy. Maqsat áleýmettik medısınalyq saqtandyrý qorynyń qarjysyn ıemdený bolǵan.
Qylmystyq jospardy iske asyrý úshin N. «Densaýlyq saqtaýdy damytý ulttyq ǵylymı ortalyǵynyń» Astana fılıalynda jumys isteıtin maman A.-ǵa zańsyz tirkeý ótinimderin bekitip berý jóninde aqshalaı syıaqy usynǵan. A. bul usynysqa kelisip, qyzmettik múmkindigin paıdalana otyryp, jalǵan ótinimderdi rastaǵan.
1 qańtardan bastap MÁMS júıesine birqatar ózgeris engiziledi
Nátıjesinde medısınalyq uıymǵa 15 myńnan astam azamat qaǵaz júzinde tirkelip, Qor qarjysy zańsyz alynǵan. Mamandar qorytyndysyna sáıkes, keltirilgen jalpy shyǵyn shamamen 80 mln teńgeni quraıdy. Sonyń 7,5 mln teńgesi A.-nyń tikeleı áreketterinen kelgen materıaldyq zalal retinde baǵalanǵan. Zańsyz alynǵan qarajat eki aıyptalýshy arasynda bólingen.
MÁMS júıesindegi olqylyqtar: Qaıtys bolǵan adam dáriger qabyldaýynda bolǵan
Sotta prokýror N.-ǵa 5 jyl, al A.-ǵa 2 jyl 8 aı bas bostandyǵynan aıyrý jazasyn surady. Aıyptalýshylar kinálaryn tolyq moıyndap, qorǵaý tarapy shartty jaza taǵaıyndaýdy ótingen. Kiná moıyndaý kórsetilimderi, jábirlenýshi men kýálardyń aıǵaqtary, sondaı-aq maman qorytyndysy qylmysty dáleldeıtin negiz retinde tanyldy.
MÁMS: 2026 jyly saqtandyrý esebinen emdeletin aýrýlar tizimi keńeıtildi
Sot jeńildetetin mán-jaılar retinde kámeletke tolmaǵan balalarynyń baryn, kináni moıyndaýdy, shyn júrekten ókinýdi jáne buryn sottalmaǵanyn eskerdi. Aýyrlatatyn mán-jaılar anyqtalǵan joq. Alaıda keltirilgen iri kólemdegi shyǵyn ótelmegeni nazarǵa alyndy.
Osyǵan baılanysty N. ortasha qaýipsizdik mekemesinde 5 jyl bas bostandyǵynan aıyrý jazasyna kesildi. A.-ǵa 3 jyl jaza taǵaıyndalyp, amnıstııa týraly zańǵa sáıkes merzim 1/5 bólikke qysqartylyp, túpkilikti 2 jyl 4 aı bolyp belgilendi.
Úkim ázirge zańdy kúshine engen joq.